Əziz dostlar,
Mingəçevir Valideynlər Assosiasiyası Çexiya (“Transitions”) və Polşadan (“Linking”) olan tərəfdaşları ilə birgə sizi Avropa Birliyinin maliyyələşdirdiyi və BMT-nin İnkişaf Proqramı tərəfindən həyata keçirilən “Əhalinin həssas qruplarının sosial-iqtisadi hüquqlarının təmin olunmasında vətəndaş cəmiyyətinin rolunun gücləndirilməsi” layihəsi çərçivəsində açıq məlumatlara dair növbəti silsilə təlimlərə dəvət edir. Bu təlimlər 2017-ci il martın 10-dan 19-dək Mingəçevir Media Mərkəzində keçiriləcək. Təlimlər Azərbaycanın kütləvi informasiya vasitələri, QHT və dövlət müəssisələri nümayəndələri üçün nəzərdə tutulub. Təlimin məqsədi bu üç qrup nümayəndələrinə açıq məlumatların geniş mahiyyətini başa salmaq, əhali ilə birgə fəaliyyət zamanı jurnalistlərə, fəallara və dövlət qulluqçularına necə kömək edəcəklərini öyrətməkdir.
Açıq məlumatlar son bir neçə il ərzində bütün dünyada inkişaf etməkdə olan bir istiqamətdir. O əsas diqqəti medianın və QHT-lərin daha çox əlavə auditoriya cəlb etmələrinə, dövlət orqanlarının ictimaiyyətlə iş zamanı mürəkkəb informasiyanı daha sadə və əyani şəkildə, asan başa düşülən tərzdə çatdıra bilmələrinə hesablanıb.
Əgər siz onlayn nəşrlərinizdəki oxucularınızın, QHT ilə əməkdaşlıq edən fəallarınızın sayını artırmaq, yaşadığınız regionda ictimaiyyətlə işin effektivliyini artırmaq istəyirsinizsə, onda bizim təlimlərə qatılın.
Biz bu dəfə də iki qrup yaradırıq.Birinci qrup üçün təlim martın 10-dan 12-nə, ikinci qrup üçün isə martın 17-dən 19-dək aparılacaq. Təlimlərdən sonra iştirakçılarla məşğələlər onlayn formada davam edəcək.
Təlimin mövzuları:
1. Təklif edilən mövzular üzrə xəritələrin yaradılması.
2.Data jurnalistikaya dair perspektiv layihələrin müzakirəsi.
3.Xəritəçəkmə və qrafiklərin yaradılması. Zamanın əyaniləşdirilməsi.
4.Özəl layihələr üzərində işin təqdimatı.
5.Tableau-ya giriş və onun üzərində işin davam etdirilməsi
Məşğələlər Şərqi Avropada açıq məlumatlardan yüksək səviyyədə istifadə edən Linking Media təşkilatının mütəxəssisləri tərəfindən aparılacaq. 2012-ci ildən bəri Linking Media açıq məlumatların geniş yayılmasında iştirak edib, yerli kütləvi informasiya vasitələrinə və QHT-lərə əyani materialların, vasitələrin sayının artırılmasına və öz səhifələri üçün yeni auditoriyanın cəlb olunmasına kömək edib.
Təlimlərə qatılmaq istəyənlər fevralın 15-nə, saat 18.00-dək CV-lərini təlimə nə üçün qatılmaq istədikləri barədə məlumatla birgə aşağıdakı ünvana göndərə bilərlər: datajournalism2017@gmail.com
Seçilənlərin ünvanlarına təlimin yeri və vaxtı barədə məlumat göndəriləcək. Təlim iştirakçılarının nəqliyyat, yemək və otel xərcləri təşkilatçılar tərəfindən ödəniləcək. Onlar MVA/LM/Tranzitions təşkilatlarının Avropada sonrakı tədris proqramlarında seçimlərdə iştirak edə biləcəklər.
QEYD: Bundan əvvəlki elanda ərizələrin qəbulu üçün son müddət fevralın 20-si göstərilmişdi. Lakin müraciət edənlərin sayı nəzərdə tutulduğundan xeyli çox olduğundan və təşkilati işlərlə əlaqədar ərizə qəbulunun müddətini qısaltmalı olduq.
Şərhlər bağlıdır.