IKT

Dörd mingəçevirli qalib sırasında yer alıb

İnformasiya Texnologiyalarının İnkişafı Dövlət Fondu qrant müsabiqəsinin qaliblərinə sertifikatları təqdim edib.

Mingəçevir Dövlət Universitetində  Fond rəsmilərinin və digər dəvətli qonaqların iştirakı ilə layihələrin təqdimat mərasimi  düzənləib. Tədbiri açıq elan edən Mingəçevir Dövlət Universitetinin rektoru Akif Hacıyev  adı çəkilən Fond tərəfindən təhsil ocağı bazasında yaradılmış İnnovativ Biznes İnkubatorun fəaliyyəti və əhəmiyyəti barədə söhbət açıb. Daha sönra tədbirin məram və məqsədlərilə bağlı fikirlərini paylaşan İnformasiya Texnologiyalarının İnkişafı Dövlət Fondunun icraçı direktoru, professor Elçin Zeynalov təmsil etdiyi Fondun startap layihələrə göstərdiyi dəstək barədə  məlumat verib. Qeyd edib ki,Fondun elan etdiyi dördüncü qrant müsabiqəsinə 121 layihə təqdim edilib  və nəticə etibarilə onlardan  29-u qalib elan olunub.  Müəyyən olunmuş layihələrin icrası məqsədilə Fond tərəfindən  395 000  manat qrant vəsaiti ayrılıb.  Təqdirəlayiq haldır ki, qaliblər arasında  dörd  nəfər  mingəçevirlinin də adı yer alıb.

Təqdimat mərasimində Yüksək Texnologiyalar Parkının direktor müavini, iqtisad elmləri üzrə fəlsəfə doktoru Kənan Bayramovun analoji xarakterli fikirləri də iştirakçılar tərəfindən maraqla qarşılanıb.

Bundan sonra müsabiqənin qalibi adını qazanmış  Məhəbbət Əhmədov, Elmir Allahverdiyev  və Kamal Əhmədov   “İntellektual multi bələdçi”, ”Öyrən, tətbiq et və qazan “ və ”Əl işinin ticarəti” adlı layihələrini  iştirakçılara təqdim ediblər. Adı qaliblər sırasında yer alan dördüncü mükafatçı  Rüfət Qazızadənın üzürlü səbəbdən tədbirə qatılmaması üzündən  “Enyoymingo.az” (Mingəçevirdən həzz al)  turizm layihəsi haqqında  müəllifin iştirakı olmadan yalnız  müəyyən informasiya verilib. Bundan sonra qrant müsabiqəsi qalıblərinə Fond tərəfindən təsis olunmuş sertifikatlar təqdim olunub.

Qeyd edək ki, İnformasiya Texnologiyalarinin İnkişafı Dövlət Fondu, Mingəçevir Dövlət Universiteti də daxil olmaqla, ölkənin  yeddi ali təhsil müəssisəsində yaradılmış  İnnovativ Biznes İnkubatorlara və mərkəzlərin fəaliyyətinə   dəstək verməklə gənclərin  informasiya-kommunikasiya texnologiyaları sahəsinə marağını artırmaqla kütləviliyə nail olmaq niyyətindədir. Məhz bu məqsədlə vaxtaşırı inkubatorlarda layihələrə dəstək məqsədilə infosessiyalar təşkil edir.

Ehtiram Muradlı

Daha çox

Oxşar yazılar

Bu xəbəri oxumusunuz?

Close
Close