Afula-Mingəçevir qardaşlaşmış şəhərlər oldu

“Mən Azərbaycanı  yaxşı tanıyıram. 5 il ölkənizdə  İsrailin səfiri olmuşam. Bu dəfə isə Azərbaycana və şəhərinizə nümayəndə heyəti ilə İsraildən gəlmişəm.  İstəyirik ki, bizim və sizin yaşadığınız şəhərlərin mədəni və digər əlaqələrini quraq”.

Bu sözləri iyulun 9-da Mingəçevir və  Afula şəhərlərinin  qardaşlaşması haqqında müqavilə imzalanarkən   Afula şəhər merinin müavini Mixail Barkan deyib. Onun fikrincə, bu əlaqələr əsasən mədəniyyət sahəsini əhatə etsə də, İsrailin şərqində yerləşən və 47 min nəfər əhalisi olan Afula şəhəri ilə digər sahələrdə də əməkdaşlıq imkanları mövcuddur.

Mingəçevir Şəhər İcra Hakimiyyətinin başçısı Niyazi Bayramov müqavilənin imzalanması mərasimində  şəhərin tarixi, coğrafi mövqeyi, əhalisi və ifrastrukturu barədə məlumat  verib. O, bildirib ki, Mingəçevirdə  böyk  enerji  stansiyaları,   iri maşınqayırma və  kimya müəssisələri fəaliyyət göstərir, turizm üçün geniş imkanlar vardır.  N.Bayramov bu müqavilənin hər iki tərəf üçün faydalı olacağına əminliyini bildirib.

İmzalanma mərasimində iştirak edən israilli  qonaqlar və  mingəçevirlilər  Heydər Əliyevin xatirəsini yad edərək, abidəsi önünə gül dəstələri düzüb,  ulu öndərin  adını daşıyan mərkəzin fəaliyyəti və burada nümayiş etdirilən eksponatlarla və  şəhərin görməli yerləri ilə tanış olublar. Müqavilənin imzalanmasından sonra  Afula  şəhərinin nümayəndələri mingəçevirlilərə xatirə hədiyyələrini  təqdim ediblər.