Media əlillilyi olan qadınlara və Qarabağ müharibəsi veteranlarına diqqəti artırır

Azərbaycan hökumətinin beynəlxalq təşkilatla birlikdə icra etdiyi  “Əlilliyi olan qadınların və Qarabağ müharibəsi veteranlarının hüquqlarının və rifahının təmin edilməsi” layihəsinə yekun vurulub

 Media kampaniyası çərçivəsində layihənin həyata keçirildiyi Bakı, Salyan və Masallı rayonlarında yaşayan 50 nəfər əlilliyi olan qadın, Qarabağ müharibəsi veteranı və media nümayəndələrindən ibarət birgə qruplar formalaşdırılıb və 2021-ci ilin aprel ayında həmin qruplar üçün onlayn səmt təlimləri təşkil edilib. Təlimlərdə iştirak edən qruplar əlilliyi olan şəxslər üçün əlverişli mühitin yaradılması və inklyuzivliyin təşviqi məqsədilə sosial videoçarxlar və KİV üçün məqalələr hazırlayıb. Materialların hazırlanması prosesində qruplara peşəkar mentorlar tərəfindən dəstək göstərilib. Media kampaniyasının yekununda ərsəyə gələn sosial videoçarxlar və məqalələrin içərisindən münsiflər heyəti tərəfindən ən yaxşı nümunələr seçilib, I yerin qalibi 900 AZN, II yerin qalibləri hər biri 600 AZN, III yerin qalibləri isə hər biri 300 AZN məbləğində mükafatlandırılıblar.  2019-2021-ci illəri əhatə edən layihənin əsas məqsədi qadınlara və Qarabağ müharibəsi veteranlarına xüsusi diqqət yetirilməklə, Azərbaycan hökuməti tərəfindən əlilliyi olan şəxslərin sosial təminat hüquqlarının müdafiəsi, təmin edilməsi və həyata keçirilməsi istiqamətində göstərilən səylərə dəstək verməkdən ibarətdir.

Bu barədə avqustun 25-də kampaniyanın yekunlarına həsr oluna tədbirdə danışılıb. Əmək və Əhalinin Sosial Müdafiəsi Nazirliyinin məşğulluq siyasəti və demoqrafik inkişaf məsələləri şöbəsinin müdiri Rəşad Dayıyev Azərbaycan Respublikasının Birinci vitse-prezidenti Mehriban Əliyevanın təşəbbüsü ilə Əmək və Əhalinin Sosial Müdafiəsi Nazirliyi, BMT Əhali Fondu (UNFPA) və BMT İnkişaf Proqramının (UNDP) layihəsi çərçivəsində Education HUB tərəfindən icra olunan “Əlilliyi olan qadınların və Qarabağ müharibəsi veteranlarının hüquqlarının və rifahının təmin edilməsi” layihəsinin önəmindən bəhs edib. O, layihənin həssas qrupların hüquqlarının və rifahının təminatı, onların məşğulluq imkanlarının artırılması sahəsində hökumətin apardığı işlərə mühüm dəstək olduğunu deyib. Layihə çərçivəsində həyata keçirilmiş media kampaniyasının əhəmiyyətini diqqətə çatdırıb.

BMT İnkişaf Proqramının  Azərbaycandakı rezident nümayəndəsinin müavini Çaru Bist vurğulayıb ki, media məlumatlılığın artırılması istiqamətində, eləcə də damğalanmaya və dezinformasiyaya qarşı mübarizədə mühüm vasitə ola bilər. Onun sözlərinə görə, medianın cəmiyyətdəki yanlış təsəvvürlərin dəyişdirilməsində və əlilliyi olan insanların cəmiyyətə layiqincə təqdim edilməsində rolu danılmazdır.