Azərbaycan Respublikasının Elm və Təhsil Nazirliyinin Təhsildə inkişaf və innovasiyalar üzrə VIII qrant müsabiqəsinin qalibi olmuş “STEAMlab” layihəsi uğurla həyata keçirilib

Azərbaycan Respublikasının Elm və Təhsil Nazirliyinin Təhsildə inkişaf və innovasiyalar üzrə VIII qrant müsabiqəsinin qalibi olmuş “STEAMlab” layihəsi uğurla həyata keçirilib. Layihə çərçivəsində təhsil sahəsində innovativ yanaşmaların tətbiqi və region məktəblərində STEAM (elm, texnologiya, mühəndislik, incəsənət və riyaziyyat) istiqamətləri üzrə tədrisin təşviqi məqsədi daşıyan genişmiqyaslı fəaliyyətlər reallaşdırılıb.

Layihənin əsas məqsədi Gədəbəy rayonunun Novosaratovka kənd tam orta məktəbində təhsil alan V-IX sinif şagirdləri üçün müasir təhsil metodlarına əsaslanan STEAM dərslərinin təşkili, bu sahədə onların marağının artırılması və məktəbin SAF Azerbaijan festivalına hazırlığı olmuşdur. Layihə vasitəsilə kənd məktəbində təhsil alan uşaqların texnologiya və mühəndislik sahələrinə olan maraqlarının oyadılması, yaradıcılıq və tənqidi düşüncə bacarıqlarının inkişaf etdirilməsi hədəflənib.

Bu məqsədlə layihə çərçivəsində müasir tədris metodlarına əsaslanan praktiki və nəzəri təlimlər təşkil olunub. Şagirdlər müxtəlif texnoloji vasitələr, alətlər və qurğularla tanış olmuş, onların işləmə prinsiplərini öyrənmiş və bu qurğuların tətbiqi sahələri barədə məlumatlandırılıblar. Təlimlər zamanı uşaqlara yalnız nəzəri biliklər deyil, həm də praktiki bacarıqlar öyrədilib – onlar komandalar şəklində işləyərək müxtəlif layihələr üzərində işləyib, innovativ həll yolları axtarıb və təqdim ediblər.

Layihə çərçivəsində təşkil olunan təlimlərdə şagirdlərə kodlaşdırma, robototexnika, 3D modelləmə, layihə əsaslı öyrənmə (PBL) kimi müasir yanaşmalarla tanış olmaq imkanı yaradılıb. Təlimlər eyni zamanda şagirdlərin məntiqi düşünmə, problem həll etmə və analitik təhlil bacarıqlarının formalaşmasına xidmət edib.

Bundan əlavə, layihə çərçivəsində şagirdlərin ölkə səviyyəli texnoloji və yaradıcılıq müsabiqələrinə hazırlığı üçün xüsusi proqramlar hazırlanıb. Bu proqramlar vasitəsilə onların mövcud bilikləri möhkəmləndirilib, praktiki məşğələlər təşkil olunub və real layihələr üzərində işləmək təcrübəsi qazandırılıb. SAF Azerbaijan festivalında iştirak məqsədilə məktəbdə yaradıcı mühit formalaşdırılıb və şagirdlərin təqdimat bacarıqları üzərində xüsusi iş aparılıb.

Layihə nəticəsində Novosaratovka kənd tam orta məktəbində texnoloji və yaradıcı düşüncəni təşviq edən mütərəqqi mühit formalaşdırılıb, şagirdlər arasında elm və texnologiyaya maraq əhəmiyyətli dərəcədə artıb. “STEAMlab” layihəsi yalnız məktəbin şagirdlərinə deyil, eyni zamanda müəllim heyətinə də müasir təhsil metodikalarının tətbiqi baxımından fayda verib.

Gələcəkdə bu cür layihələrin daha geniş miqyasda tətbiqi nəzərdə tutulur. Qeyd etmək istərdik ki, “STEAMlab” layihəsi təkcə bir məktəbdə həyata keçirilmiş yerli təşəbbüs olmaqla kifayətlənmir, o həm də Azərbaycanın regionlarında təhsilin keyfiyyətini yüksəltmək, innovativ yanaşmaları təşviq etmək və kənd məktəblərini müasir dövrün tələblərinə uyğunlaşdırmaq baxımından strateji əhəmiyyət daşıyır. Bu layihə gələcəkdə daha geniş miqyasda həyata keçiriləcək təşəbbüslər üçün zəmin yaradır və ölkəmizin təhsil sistemində innovativ dəyişikliklərin başlanğıcı kimi qiymətləndirilə bilər.