Mingəçevir Dövlət Universitetinin tələbələri universitet-sənaye əməkdaşlığı çərçivəsində “Azərbaycan İES” MMC-də Açıq dərs

“Elm, təhsil və istehsalat – birgə çalışmalıdır”. 2025-ci ilin 3 noyabr tarixində AMEA-nın 80 illik yubileyi münasibətilə keçirilmiş konfransda çıxış edən Prezident İlham Əliyev vurğulayıb ki, “bu gün elmlə istehsal, təhsil və sənaye birləşməli, alimlərin gördüyü tədqiqatlar real iqtisadiyyatın, ölkənin gələcəyinin inkişafına xidmət etməlidir.” Dövlət başçısı dövlət qurumlarını, universitetləri və elmi ictimaiyyəti bu istiqamətdə sıx əməkdaşlığa, elmi nailiyyətləri praktik tətbiqə — sənaye layihələrində, texnoloji və istehsal sahələrində aktiv iştiraka çağırıb.
Mingəçevir Dövlət Universiteti (MDU) ilə “Azərbaycan İES” MMC arasında mövcud əməkdaşlıq çərçivəsində tədrisin praktiki yöndə inkişaf etdirilməsinə uyğun olaraq Energetika mühəndisliyi və Elektrik və elektronika mühəndisliyi ixtisaslarının bir sıra praktikyönümlü fənləri stansiyanın Tədris Mərkəzində keçirilir.
Buna uyğun olaraq 2025-ci ilin 28 noyabr tarixində Enm24 və Eem22 qruplarına Açıq dərs stansiyanın Tədris Mərkəzində təşkil edilmişdir. Dərsləri MDU-nun Energetika kafedrasının gənc müəllimi və stansiyanın əməkdaşı Qədir Məmmədli tədris edib.
O, tələbələrə nəzəri biliklərin real istehsalat mühitində tətbiqi ilə bağlı əyani nümunələr təqdim edərək onların ixtisas hazırlığının möhkəmləndirilməsinə xüsusi diqqət göstərib.
Sənaye mühitində keçirilən dərsdə stansiyanın əməkdaşları və MDU-nun bir qrup akademik heyəti də iştirak edib, tələbələrin hazırladıqları təqdimatlar maraqla qarşılanıb. Tələbələrin istehsalat prosesi, energetik avadanlıqların işləmə prinsipləri və real əməliyyat şəraiti haqqında biliklərinin artdığı qeyd olunub.
Mingəçevir Dövlət Universiteti və “Azərbaycan İES” MMC arasında yaradılmış bu əməkdaşlıq tələbələrin praktik bacarıqlarının inkişafına, həmçinin universitet–sənaye əlaqələrinin daha da gücləndirilməsinə mühüm töhfə verir.