İçməli suyun qiyməti 2 dəfə bahalaşdı

Tarif (qiymət) Şurasının növbəti iclası keçirilib, aidiyyəti qurumların müraciətlərinə baxılıb və müvafiq qərarlar qəbul edilib. Tarif (qiymət) Şurasının Katibliyindən verilən məlumata görə, “Azərsu” ASC Şuraya müraciətində bildirib ki, son illər su təchizatının əhatə dairəsinin genişləndirilməsi, əhalinin fasiləsiz və keyfiyyətli su təchizatı üçün yeni infrastrukturların istismara verilməsi ilə əlaqədar elektrik enerjisi, mal-material, nəqliyyat və təmir xərcləri artmış, həmçinin, Səhmdar Cəmiyyət üzrə işçilərin sayının və əməkhaqların yüksəlməsi nəticəsində mövcud tariflərlə gəlirlər fəaliyyət üzrə xərcləri qarşılamır. Bu xərclərin ödənilməsi üçün dövlət büdcəsindən subsidiya ayrılır.

Tarif (qiymət) Şurasının iclasında “Azərsu” ASC-nin təklifi əsasında əhali üzrə su təchizatı və tullantı sularının axıdılması xidmətlərinin tariflərinə yenidən baxılıb. Su təchizatı və tullantı sularının axıdılması xidmətlərinin fasiləsizliyinin təmin edilməsi və Səhmdar Cəmiyyətin maliyyə-təsərrüfat fəaliyyətinin sağlamlaşdırılması üçün bir kub metr su təchizatının tarifi ƏDV daxil olmaqla əhali üzrə Bakı, Sumqayıt, Xırdalan şəhərləri və Abşeron rayonu üçün 70 qəpik, digər inzibati ərazi vahidləri üzrə 60 qəpik, tullantı sularının axıdılması xidmətinin tarifi isə ölkə üzrə bir kub metr üçün 30 qəpik səviyyəsində təsdiq edilib.

Məlumatda bildirilir ki, tarif dəyişikliyi nəticəsində “Azərsu” ASC-nin dövlət büdcəsindən asılılığı azalacaq, büdcədə sərbəstləşən vəsait ölkədə həyata keçirilən sistemli və davamlı xarakter daşıyan sosial siyasətə uyğun olaraq, sosialyönümlü tədbirlərə yönəldiləcəkdir. Qeyd olunur ki, su təchizatı və tullantı sularının axıdılması xidmətləri üzrə sonuncu qiymət tənzimlənməsi 13.05.2016-cı il tarixində aparılıb. Ötən müddət ərzində abonentlərin sayı 200 mindən çox artıb, “Azərsu” ASC tərəfindən həyata keçirilən su təchizatının əhatə dairəsi 50%-dən 70%-ə, fasiləsiz su təchizatı isə 65,6%-dən 70,5%-ə yüksəlib.

Şuranın iclasında həmçinin, dərman vasitələrinin və maddələrinin ekspertizası xidmətləri tariflərinə də baxılıb. Belə ki, Səhiyyə Nazirliyinin “Analitik Ekspertiza Mərkəzi” publik hüquqi şəxsi Tarif (qiymət) Şurasına müraciət edərək, Nazirlər Kabinetinin müvafiq qərarı ilə dərman vasitələrinin ilkin və ixtisaslaşdırılmış ekspertiza müddətinə edilən dəyişiklik və dərman vasitəsinin qeydiyyata alınması məqsədi ilə daha 4 növ ixtisaslaşdırılmış xidmətin müəyyənləşdirildiyini nəzərə alaraq, dərman vasitələrinin və dərman maddələrinin ekspertizası xidmətləri üzrə tariflərə baxılmasını təklif edib. İclasda publik hüquqi şəxsin müraciəti müzakirə olunub və yeni tariflər təsdiq edilib. Tarif dəyişikliyi nəticəsində yaranan əlavə vəsait dərman vasitələrinin ekspertizasının daha qısa müddətdə aparılması və yeni xidmətlərin həyata keçirilməsi üçün əlavə iş yerlərin yaradılmasına, işçilərin sosial müdafiəsinin gücləndirilməsinə, analizlərin aparılması üçün əlavə avadanlıqların alınmasına yönəldiləcəkdir.

Qərarlar 2021-ci il 1 fevral tarixindən qüvvəyə minir.

İclasda, həmçinin yeni dövlət qeydiyyatına alınan 50 dərman vasitəsinin qiyməti də təsdiq edilib. Qeyd edək ki, ticarət adı, farmasevtik forması, təsiredici maddəsinin adı, dozası, ticarət qablaşdırması, qablaşdırma miqdarı, istehsal ölkəsi nəzərə alınmaqla indiyədək topdan və pərakəndə satış qiymətləri və qüvvəyə minmə tarixi təsdiq edilən 12442 dərman vasitəsinin tam siyahısı Tarif (qiymət) Şurasının rəsmi internet saytının (www.tariff.gov.az) “Dərman vasitələri” bölməsində (http://tariff.gov.az/documents/DVA.pdf) yerləşdirilib.

Qərarlarla saytın (www.tariff.gov.az) “Şuranın qərarları” bölməsində tanış olmaq olar.