Zəngəzur dəhlizi layihəsi irəliləyir

Erməni politoloq Benyamin Matevosyan bildirib ki, Azərbaycan və Ermənistan arasında Zəngəzur dəhlizinin açılması ilə bağlı razılaşma mövcuddur. Bu dəhliz ölkənin əsas hissəsi ilə Naxçıvanı birləşdirəcək və regional nəqliyyat infrastrukturunda mühüm rol oynayacaq.

Matevosyanın sözlərinə görə, layihənin istifadəyə verilməsi 2028-ci ilin ikinci yarısında nəzərdə tutulur. O qeyd edib ki, həm Azərbaycan, həm də Ermənistan liderləri yaxın zamanlarda dəhlizin işə salınması tarixi ilə bağlı konkret açıqlamalar veriblər.

“İstər ‘Tramp yolu’, istər ‘Zəngəzur dəhlizi’, istərsə də ‘Sülh qovşağı’ adlandırılsın, məqsəd eynidir – 2028-ci ilin ikinci yarısında dəhlizin istifadəyə verilməsi planlaşdırılır. Azərbaycan Prezidenti İlham Əliyev və Ermənistan Baş naziri Nikol Paşinyan bu barədə müvafiq bəyanatlar veriblər və tarix üzrə razılıq yaranıb”, – ekspert vurğulayıb.

Matevosyan həmçinin layihənin regional iqtisadi əməkdaşlıq və nəqliyyat imkanlarını genişləndirmək baxımından əhəmiyyətini də qeyd edib.