Vəkil olmaq istəyənlər üçün yeni mərhələ: Test imtahanı başlayır

Azərbaycan Vəkillər Kollegiyasına üzv olmaq istəyən namizədlər bu gün Dövlət İmtahan Mərkəzi tərəfindən təşkil edilən test imtahanında iştirak edəcəklər.

DİM-in məlumatına görə, namizədlərin sənəd qəbulu Vəkillər Kollegiyası tərəfindən aparılıb və imtahanda iştirak üçün ümumilikdə 423 nəfər qeydiyyatdan keçib.

İmtahan kompüter vasitəsilə elektron formada keçirilir və Dövlət İmtahan Mərkəzinin elektron imtahanlar korpusunda (Bakı şəhəri, Binəqədi rayonu, S.S. Axundov 50, TÜRKPA-nın yanı) saat 10:00-da start götürür. Üç saat davam edəcək imtahanda iştirakçılar yalnız buraxılış vərəqəsində göstərilən vaxtda zala daxil ola bilərlər.

Namizədlər imtahanı bitirdikdən dərhal sonra nəticələrlə tanış ola biləcək. Eyni zamanda nəticələr DİM-in rəsmi saytında da yerləşdiriləcək.

İmtahana gələn şəxslər buraxılış vərəqəsi və şəxsiyyət vəsiqəsinin əsli ilə təqdim olunmalıdır. Hər hansı sənədin olmaması və ya uyğunsuzluğu namizədin imtahana buraxılmaması ilə nəticələnəcək.

Namizədlərə qanunvericilik sahəsi üzrə 100 test tapşırığı təqdim olunacaq. Hər düzgün cavab 1 balla qiymətləndirilir və səhv cavablar ümumi nəticəyə təsir göstərmir. İmtahandan 60 və daha yüksək bal toplayanlar növbəti mərhələyə keçid əldə edəcəklər.