Putinə sarsıdıcı zərbə: Rusiya Venesueladakı müttəfiqini itirdi

ABŞ-ın Venesueladakı hərbi əməliyyatı nəticəsində Prezident Nikolas Maduro devrilib. Moskva bu hadisəni pisləyərək Maduro rejimi ilə möhkəm tərəfdaşlığını vurğulasa da, analitiklər bu hadisənin Rusiyanın beynəlxalq nüfuzuna ciddi zərbə vurduğunu qeyd edirlər.

“The Telegraph” qəzetinin analitiki Samuel Ramani bildirib ki, Maduronun sürətli devrilməsi Rusiya üçün Latın Amerikasında nüfuz itkisini göstərir. “2015-ci ildən Suriyada Başar Əsədin xeyrinə hərbi müdaxilə edərkən Rusiya özünü avtoritar rejimlər üçün etibarlı tərəfdaş kimi təqdim edirdi. Amma 2024-cü ilin dekabrında Əsədin devrilməsi və 2025-ci ilin iyununda İran-İsrail müharibəsi zamanı Rusiyanın hərəkətsizliyi, eləcə də Maduronun çöküşü bu illuziyanı tamamilə məhv etdi”, – Ramani əlavə edib.

Ekspert həmçinin vurğulayıb ki, əvvəllər Venesueladakı Rusiya PUA və S-300/S-400 sistemləri ABŞ-ın və digər dövlətlərin müdaxilələrini dayandırmaq üçün reklam edilirdi, lakin real vəziyyət gözləntiləri doğrultmayıb. Nəticədə, Rusiyanın hava hücumundan müdafiə sistemlərinə etimadı rekord səviyyədə azalıb, bu isə ölkənin silah tədarükçüsü kimi nüfuzunu və regional təsir imkanlarını zəiflədə bilər.

Ramani qeyd edib ki, Venesuela regionda Rusiya təsirinin əsas dayaqlarından biri idi. “Rosneft ABŞ-ın sanksiyalarından faydalanırdı, Maduro rejimi isə Rusiya ilə gizli əməkdaşlıq edirdi. Amma indi Moskvanın mövqeyi Kuba və Nikaraqua ilə zəif tərəfdaşlıq əlaqələrinə bağlıdır. ABŞ Prezidenti Donald Trampın hərəkəti Putinə alçaldıcı zərbə oldu və Rusiya diktatorunun Ukraynada müharibəni dayandırmaq səylərinə təsir göstərdi”, – ekspert bildirib.