Paşinyan sərhəd bölgələrinə səfərlərlə bağlı məhdudiyyəti ləğv etməyə hazırlaşır

Baş nazir Nikol Paşinyan hökumət iclasında bildirib ki, Ermənistanda fəaliyyət göstərən xarici səfirliklər vətəndaşlarını ölkənin sərhəd bölgələrinə səfər etməməyə çağırmaqdan imtina etməlidirlər.

Paşinyan hansı ölkələrin səfirliklərindən danışdığını dəqiqləşdirməsə də, bu cür xəbərdarlıqların əsasən Qərb səfirlikləri tərəfindən yayıldığı vurğulanır. Onun sözlərinə görə, əvvəllər bəzi səfirliklər, xüsusən Sünik bölgəsinə səfərləri məhdudlaşdırmaq barədə davamlı xəbərdarlıq edirdilər.

“Cənab Mirzoyan (xarici işlər naziri), biz bu səfirliklərlə işləməliyik ki, onlar bu xəbərdarlıqları davam etdirməsinlər”, – deyə Paşinyan qeyd edib.

Baş nazir beynəlxalq hesabatlarda Ermənistanın cinayətkarlıq səviyyəsinə görə təhlükəsiz ölkə kimi göstərildiyini, 2025-ci ilin məlumatlarının da bunu təsdiqlədiyini bildirib.

Qeyd olunur ki, bəzi xarici səfirliklər illərdir vaxtaşırı olaraq vətəndaşlara Azərbaycanla sərhəd bölgələrinə səyahət etməmələri barədə xəbərdarlıq edirlər.