Nigeriya “dünyanın ən pis ölkəsi” seçildi

Dünyanın həyat keyfiyyətinə görə ən pis ölkəsinin adı açıqlanıb.

İnanılmaz təbii sərvətləri və vəhşi təbiət qoruqları ilə tanınan Afrika ölkəsi 2025-ci ildə dünyanın ən pis həyat keyfiyyətinə malik ölkəsi seçilib. Söhbət Nigeriyadan gedir.

BMT məlumatlarına və Dünya Əhali İcmalı hesabatlarına görə, Nigeriya hətta İraq və Əfqanıstan kimi müharibədən əziyyət çəkən ölkələri də geridə qoyaraq, birinci yerdə qərarlaşıb.

Davamlı yoxsulluq, ciddi sağlamlıq problemləri, zəif infrastruktur və ətraf mühitin pisləşməsi ilə mübarizə aparan 57 milyon nigeriyalı təhlükəsiz sudan, 130 milyondan çox insan isə sanitariya şəraitindən məhrumdur.

Ölkədə həmçinin 10 milyondan çox uşaq məktəbə getmir. Həyat Keyfiyyəti İndeksi səhiyyə, yaşayış dəyəri, iqlim və digər əsas amilləri nəzərə alaraq ümumi rifahı ölçür. Nigeriya cəmi 21,5 bal toplayıb ki, bu da ölkənin gündəlik həyatına mənfi təsir edən problemləri əks etdirir.

Reytinqdə zəifləyən iqtisadiyyat da əsas səbəblərdən biri kimi göstərilir. Ölkə hazırda son onilliklərin ən ağır iqtisadi böhranını yaşayır. İllik inflyasiya təxminən 30 faizdir, valyuta sürətlə ucuzlaşır və yoxsulluq artır.

Siyahıda Banqladeş ikinci yerdə qərarlaşıb. Yoxsulluq, yüksək çirklənmə, qeyri-adekvat səhiyyə sistemi bu Cənubi Asiya ölkəsini 73,9 balla Nigeriyadan sonra gətirib.

Üçüncü yerdə isə neft ehtiyatları ilə zəngin Venesuela dayanır.