Mingəçevirdə “Heydər Əliyev İli” çərçivəsində elmi-praktik konfrans keçirilib

2023-cü ilin fevralın 28-də Mingəçevir Dövlət Universiteti (MDU) və Yeni Azərbaycan Partiyasının (YAP) Mingəçevir şəhər təşkilatının birgə təşkilatçılığı ilə “Heydər Əliyev İli” çərçivəsində Heydər Əliyevin Azərbaycana rəhbərliyinin birinci dövrünə həsr olunan “Ümummilli Lider: tarix yaradan Heydər Əliyev nümunəsi” mövzusunda elmi-praktik konfrans keçirilib. Konfransda MDU-nun bir qrup akademik və inzibati heyət üzvü, tələbə və magistrantları, şəhər partiya təşkilatının nümayəndələri iştirak ediblər.

Əvvəlcə, Ulu Öndərimizin və Vətən uğrunda canından keçən qəhrəman şəhidlərimizin əziz xatirəsi bir dəqiqəlik sükutla yad edilib və Azərbaycan Respublikasının Dövlət Himni səsləndirilib.

Konfransın açılışında çıxış edən MDU-nun rektoru Şahin Bayramov ümummilli lider Heydər Əliyevin 100 illik yubileyi çərçivəsində təşkil olunan elmi tədbirin müstəqil Azərbaycanın qurucusu olan dahi şəxsiyyətin zəngin irsinin öyrənilməsi və gənc nəsil arasında təbliği məqsədi daşıdığını vurğulayıb. Rektor qeyd edib ki, MDU ilə YAP Mingəçevir şəhər təşkilatının işbirliyi çərçivəsində cari ildə əbədiyaşar liderin çoxşaxəli fəaliyətinin müxtəlif tarixi dövrlərinə həsr olunan silsiləvi elmi konfransların keçiriləcəyi nəzərdə tutulub. Bugünkü elmi tədbirdə Ümummilli Liderin Azərbaycana birinci rəhbərliyi dövründə həyata keçirdiyi titanik fəaliyyətlərin müxtəlif aspektləri ilə bağlı elmi məruzələrin təqdim ediləcəyini diqqətə çatdıran Ş.Bayramov konfransın işinə uğurlar arzulayıb.

Konfrans iştirakçılarını salamlayan YAP Mingəçevir şəhər təşkilatının sədri Bəxtiyar Mustafayev “Heydər Əliyev İli” çərçivəsində ölkəmizdə, o cümlədən Mingəçevir şəhərində müxtəlif formatlı tədbirlərin keçirildiyini bildirib. Ölkə iqtisadiyyatının və energetikasının inkişafında Mingəçevirin önəminin və potensialının Heydər Əliyev tərəfindən hər zaman yüksək qiymətləndirildiyini bildirən B.Mustafayev Ümummilli Liderin şəhərin hərtərəfli inkişafına göstərdiyi böyük diqqət və qayğıdan bəhs edib. Ulu Öndərin zəngin irsinin öyrənilməsi və təbliği ilə bağlı MDU-da çoxsaylı tədbirlərin təşkil edildiyini diqqətə çatdıran sədr son dövrdə universitetdə bu istiqamətdə formalaşmış müvafiq elmi potensialın və təcrübənin şəhərin ictimai-siyasi həyatına da əhəmiyyətli töhfə verməsindən məmnunluğunu ifadə edib.

Sonra, “Qəlblərdə və xatirələrdə əbədiləşən ümummilli lider Heydər Əliyev” adlı videoçarx nümayiş olunub və konfransın proqramına uyğun olaraq məruzələr dinlənilib.

MDU-nun əməkdaşlarından Fəridə Həsənli “Heydər Əliyev: Azərbaycanda milli oyanışın xarakteri və müstəqilliyə doğru böyük qayıdışın başlanması”, Saqib Məmmədov “Azərbaycan Respublikasında neft sənayesinin bərpası və inkişafı sahəsində Heydər Əliyevin misilsiz xidmətləri”, Tansu Əhmədzadə “Azərbaycan Respublikasının maliyyə sisteminin formalaşmasında və inkişaf etdirilməsində Heydər Əliyevin möhtəşəm tarixi rolu” və Natəvan Vəliyeva “Heydər Əliyevin Azərbaycana birinci rəhbərliyi dövründə iqtisadiyyatın aqrar sektorunun inkişaf tendensiyaları” mövzusunda məruzələrlə çıxış ediblər.

Məruzələr iştirakçılar tərəfindən maraqla qarşılanıb.

Sonda, Yeni Azərbaycan Partiyasına üzv olan MDU əməkdaşlarına üzvlük vəsiqələri təqdim olunub.

Qeyd edək ki, “Heydər Əliyev İli” çərçivəsində MDU-da Mingəçevir Şəhər İcra Hakimiyyəti, YAP Mingəçevir şəhər təşkilatı və digər tərəfdaşlarla birlikdə müxtəlif formatlı tədbirlər keçirilir.