Mingəçevir Dövlət Universitetində Milli Qurtuluş Günü qeyd edilib

2023-cü il iyunun 14-də Mingəçevir Dövlət Universitetində (MDU) “Heydər Əliyev İli” çərçivəsində 15 iyun – Milli Qurtuluş Gününə həsr edilən “Milli dövlətçiliyimizin xilaskarı” mövzusunda elmi konfrans keçirilib. Konfransda MDU-nun bir qrup akademik və inzibati heyət üzvü, tələbə və magistrantlar iştirak ediblər.

Əvvəlcə, ümummilli lider Heydər Əliyevin və Vətən uğrunda canından keçən qəhrəman şəhidlərimizin əziz xatirəsi bir dəqiqəlik sükutla yad edilib, Azərbaycan Respublikasının Dövlət Himni səsləndirilib.

Konfrans iştirakçılarını salamlayan MDU-nun rektoru Şahin Bayramov əlamətdar tarixi gün münasibətilə universitet kollektivini, tələbə və magistrantları təbrik edib.

Otuz il əvvəl iyunun 15-də xalqın təkidli tələbi ilə ölkə rəhbərliyinə qayıdan ümummilli lider Heydər Əliyevin xilaskarlıq missiyasından bəhs edən Ş.Bayramov bu önəmli tarixi hadisəni böyük qurtuluşa və tarixi Zəfərə gedən yolun başlanğıcı kimi xarakterizə edib. Bildirib ki, məhz Ulu Öndərin uzaqgörən və qətiyyətli siyasəti, titanik və yorulmaz fəaliyyəti nəticəsində Azərbaycan xaosdan, sosial, iqtisadi və siyasi böhrandan, vətəndaş qarşıdurmasından və nəhayət müstəqil dövlət kimi məhv olmaq təhlükəsindən qurtulub. Dünya şöhrətli siyasətçi və görkəmli dövlət xadimi Heydər Əliyevin zəngin idarəçilik məharəti və təcrübəsi sayəsində ictimai-siyasi sabitliyə, dinamik, dayanıqlı və hərtərəfli inkişaf yoluna qədəm qoyan Azərbaycanın beynəlxalq arenada nüfuzu artdı və müstəqilliyi dönməz surətdə gücləndi.

Milli Qurtuluş Gününün xüsusi təntənə ilə qeyd edilməsini Ümummilli Liderə sonsuz minnətdarlığın ifadəsi olduğunu bildirən rektor, müasir Azərbaycanın memarı Heydər Əliyevin əziz xatirəsini xalqımız tərəfindən daim böyük ehtiramla yad ediləcəyini söyləyib. Etibarlı və parlaq gələcəyimizə işıq salan dahi şəxsiyyətin zəngin irsinin öyrənilməsi və gənclər arasında təbliğinin önəmini diqqətə çatdıran Ş.Bayramov bu baxımdan “Heydər Əliyev İli” çərçivəsində MDU-da təşkil edilən müxtəlif formatlı çoxsaylı tədbirlərin əhəmiyyətindən danışıb və konfransın işinə uğurlar arzulayıb.

Sonra,15 iyun- Milli Qurtuluş Gününə həsr olunmuş videoçarx nümayiş olunub və konfransın proqramına uyğun olaraq məruzələr dinlənilib.

MDU əməkdaşlarından Mətanət Yusifova “Azərbaycan xalqının taleyini dəyişən xilaskarlıq qayıdışı”, Gülər Əjdərzadə “Milli qurtuluşdan tarixi zəfərə aparan şanlı yol”, Ayna Babazadə “Ulu Öndər Heydər Əliyevin siyasi irsi milli sərvətimizdir”, Şəlalə Quliyeva “Azərbaycanın beynəlxalq münasibətlər sisteminin “Yol Xəritəsi”nin müəllifi: Heydər Əliyev” mövzusunda məruzələrlə çıxış ediblər.

Məruzələr iştirakçılar tərəfindən böyük maraqla qarşılanıb.

Qeyd edək ki, “Heydər Əliyev ili” çərçivəsində MDU-da müxtəlif formalı tədbirlər həyata keçirilir.