Mingəçevir Dövlət Universitetində (MDU) Ulu Öndər Heydər Əliyevin anım gününə həsr olunan “Heydər Əliyev ideyaları yaşayır və qalib gəlir” mövzusunda elmi-praktiki konfrans keçirilib

10 dekabr 2024-cü il tarixində Mingəçevir Dövlət Universitetində (MDU) Ulu Öndər Heydər Əliyevin anım gününə həsr olunan “ Heydər Əliyev ideyaları yaşayır və qalib gəlir” mövzusunda elmi-praktiki konfrans keçirilib.

Tədbiri giriş sözü ilə açan MDU-nun rektoru v.m.i.e., Üzeyir Zeynalov Ulu Öndər Heydər Əliyevin Azərbaycanın dövlət quruculuğu, iqtisadiyyat, siyasət və mədəniyyət sahələrindəki böyük xidmətlərini qeyd edərək, Azərbaycanın müstəqil bir dövlət kimi mövcud olmasının məhz Ümummilli liderin adı ilə bağlı olduğunu  bildirmişdir. Azərbaycan dövlətinin memarı Heydər Əliyevin misilsiz xidmətləri barədə danışan Üzeyir Zeynalov dahi liderimizin zəngin dövlətçilik irsinin öyrənilməsi və gənc nəsillərə təbliğ edilməsi baxımından konfransın əhəmiyyətini diqqətə çatdırıb. Ü.Zeynalov Azərbaycanı daha güclü və qüdrətli dövlətə çevirmək iqtidarında olan layiqli siyasi varis, Azərbaycan Respublikasının prezidenti cənab İlham Əliyevin Ümummilli liderin siyasətini uğurla davam etdirdiyini bildirdi. İllər keçdikcə Heydər Əliyev dühasının əzəmətinin, onun şəxsiyyətinin böyüklüyünün daha aydın dərk edildiyini qeyd edən Üzeyir Zeynalov Allahdan Ulu Öndərimizə rəhmət diləyib.

Daha sonra Ümummilli lider Heydər Əliyevin həyatını əks etdirən videoçarx nümayiş olunub.

Tədbir digər çıxışlarla davam etdirilib. MDU-nun kafedra müdiri, professor, filologiya elmləri doktoru Fərəh Cəlil “Heydər Əliyev siyasəti milli təhsil sistemində tolerantlıq mühitinin formalaşdırılması mənbəyi kimi”, MDU-nun dosenti, filologiya üzrə fəlsəfə doktoru Namaz Manafov “Müasir Azərbaycanın uğur konsepsiyası: Heydər Əliyev irsi”, MDU-nun kafedra müdiri, texnika üzrə fəlsəfə doktoru Ülkər Aşurova “Heydər Əliyevin enerji strategiyası dövlət müstəqilliyimizin qarantıdır”, MDU-nun baş müəllimi, iqtisad üzrə fəlsəfə doktoru Yeganə Məmmədli “Davamlı inkişafın Heydər Əliyev modeli”, MDU-nun baş müəllimi, tarix  üzrə fəlsəfə doktoru Aygün Qədirova “Azərbaycanı Zəfər yoluna çıxaran dahi: Heydər Əliyev” mövzularında çıxış ediblər. Məruzələrdə Heydər Əliyevin tarix yazmağı bacaran dünya şöhrətli siyasətçi, yüksək intellektli, dərin analitik düşüncəli və uzaqgörən lider, zəngin və çoxşaxəli idarəetmə təcrübəsi olan dövlət xadimi, bütün həyatını və fəaliyyətini doğma xalqına xidmət, milli maraqlara sədaqət və milli dəyərlərə bağlılıq prinsipləri əsasında quraraq yüksək fədakarlıq və əzmkarlıq nümunəsi ortaya qoyan, güclü siyasi iradəyə və böyük qətiyyətə sahib olan rəhbər kimi siyasi portretindən, ölkəmizin davamlı inkişafında və tarixi qələbəsində Heydər Əliyevin zəngin irsinin misilsiz əhəmiyyətindən bəhs edilib.

Qeyd edək ki, MDU-da Azərbaycan xalqının Ümummilli liderinə həsr olunan tədbirlərin keçirilməsinə xüsusi diqqət yetirilir. Zəngin həyat və titanik fəaliyyət təcrübəsinə malik olan dahi şəxsiyyətin irsinin tələbə gənclərə ötürülməsi universitetdə vətəninə, dövlətinə və xalqına bağlı layiqli, vətənpərvər mütəxəssislərin yetişdirilməsi işinə böyük töhfə verir.