Bizimlə həyatınız həmişə işıqlı olacaq!

Mingəçevir Dövlət Universitetinin əməkdaşları şəhid ailələrinin ziyarətində

519

2022-ci ilin 17 mart tarixində Mingəçevir Dövlət Universitetinin (MDU) rektoru Şahin Bayramov və bir qrup əməkdaşı Aprel döyüşləri şəhidlərinin və Vətən Müharibəsində şəhid olmuş məzunların ailələrini ziyarət ediblər. Həmçinin, universitetin kollektiv üzvləri hazırda övladı MDU-da təhsil alan şəhid Yasən Əhmədovun da ailəsinə baş çəkiblər.

Ailə üzvləri ilə görüşdə müzəffər Ali Baş Komandanımızın rəhbərliyi ilə 44 günlük Vətən Müharibəsində tarixi Zəfərin qazanılmasında qəhrəman əsgər və zabitlərimizin mühüm pay sahibi olduğunu qeyd edən universitetin rektoru Ş.Bayramov bütün şəhidlərimizə rəhmət, qazilərimizə şəfa diləyib.

Ölkəmizin ərazi bütövlüyünün təmin edilməsi uğrunda böyük şücaət göstərən mərd oğullarımızla qürür duyduqlarını bildirən MDU əməkdaşları layiqli və vətənpərvər oğullar böyüdən valideynlərə dərin ehtiramlarını bildirib, onları qarşıdan gələn Novruz Bayramı münasibətilə təbrik ediblər.

Şəhid ailələri onlara göstərilən yüksək diqqət və qayğıya görə ölkə başçısına minnətdarlıqlarını bildiriblər.

Qeyd edək ki, doğma torpaqlarımızın işğaldan azad edilməsi uğrunda 44 günlük Vətən müharibəsində MDU-nun 4 əməkdaşı, 120-dən çox tələbə və məzunu iştirak edib, 5 məzunu – Kənan Abdullayev, Əzəmi Hüseynov, Oruc Nəcəfli, Yusif Cəfərov və Faiq Həsənov şəhidlik zirvəsinə ucalıb. Gənclərin vətənpərvərlik ruhunda yetişdirilməsinə xüsusi əhəmiyyət verən MDU-da qəhrəman şəhidlərimizin adlarının əbədiləşdirilməsi, onların göstərdikləri şücaətlərin gənc nəsil arasında təbliğ edilməsi, şəhid ailələrinin ziyarət edilməsi və müharibə iştirakçıları ilə görüşlərin keçirilməsi diqqət mərkəzində saxlanılır.

Şərhlər bağlıdır.