Maliyyə Nazirliyi yeni hesabat açıqladı

2025-ci il iyulun 1-nə olan məlumata görə, Azərbaycanın ümumi dövlət borcu — həm xarici, həm də daxili öhdəliklər daxil olmaqla — 25 milyard 695,6 milyon manat səviyyəsində olub. Bu göstərici ölkənin ÜDM-nin 19,6 faizinə bərabərdir.

Məlumat Maliyyə Nazirliyinin hazırladığı “2026–2029-cu illəri əhatə edən Ortamüddətli Xərclər Çərçivəsi” sənədində yer alıb.

Nazirliyin hesabatına əsasən, xarici dövlət borcunun həcmi 8 milyard 518,2 milyon manat (təxminən 5 milyard 10,7 milyon ABŞ dolları) təşkil edir və bu, ümumi borcun 33,2 faizinə (ÜDM-in 6,5 faizi) bərabərdir. Daxili borcun payı isə 17 milyard 177,4 milyon manat və ya 66,8 faizdir (ÜDM-in 13,1 faizi).

Xarici borc azalıb

İlin əvvəlindən bəri xarici borc 119 milyon dollar (təxminən 202,3 milyon manat) və ya 2,3 faiz azalıb. Bu, ÜDM-ə nisbətdə 0,4 faiz bəndi azalma deməkdir.

Hazırda dəyişkən faiz dərəcəsi ilə olan borclar xarici portfelin 49,3 faizini, sabit faizli öhdəliklər isə 50,7 faizini təşkil edir.

Borcun qaytarılma müddətlərinə görə bölgü belədir:

• 5 ilə qədər – 49,9%,

• 5 ildən 10 ilə qədər – 44,1%,

• 10 ildən çox – 6%.

Valyuta tərkibinə görə, borcun 85,1 faizi ABŞ dolları, 6,5 faizi avro, 3,3 faizi yapon yeni, 1,7 faizi isə digər valyutalardadır. Beynəlxalq Valyuta Fondunun xüsusi borcalma hüquqları (XBH) üzrə pay 3,4 faiz təşkil edir.

Daxili borcda da azalma müşahidə olunub

Daxili dövlət borcu ilin əvvəlindən bəri 1 milyard 482,3 milyon manat və ya 7,9 faiz azalıb. 2025-ci ilin 1 iyul tarixinə bu borcun ÜDM-ə nisbəti 1,7 faiz bəndi enib.

Daxili borcun 46,7 faizi dövlət qiymətli kağızlarının, 53,3 faizi isə “Aqrarkredit” QSC BOKT-un dövlət zəmanətli borcunun payına düşür.

Dövlət qiymətli kağızlarının strukturuna görə,

• 12,9 faizi 1 illik,

• 57 faizi 2–3 illik,

• 30,1 faizi isə 5 il və daha uzunmüddətli istiqrazlardır.