Kiberpolis əməliyyatı

Sosial şəbəkələrdə qanunsuz onlayn qumar və mərc oyunlarından əldə olunan pul vəsaitlərinin köçürülməsində istifadə edilən bank kartlarının alqı-satqısı ilə məşğul olan şəxslərə qarşı kiberpolis əməliyyatları davam etdirir.

Daxili İşlər Nazirliyinin məlumatına görə, Kibercinayətkarlıqla Mübarizə Baş İdarəsinin keçirdiyi növbəti əməliyyat zamanı bu fəaliyyətlə məşğul olan daha 8 nəfər – Dilqəm Umudov, Nurhəsən Balayev, Sərvər Məmmədov, Zaur Məmmədzadə, Atabala Qarayev, Elçin İsgəndərov, Fərid Qədirov və Coşqun Cəfərli saxlanılıb.

Araşdırmalar zamanı məlum olub ki, həmin şəxslər bank kartlarını müxtəlif vətəndaşlardan müəyyən ödəniş qarşılığında əldə edərək, daha sonra bu kartları əsasən “Telegram” vasitəsilə xaricdən idarə olunan qanunsuz onlayn qumar təşkilatçılarına satıblar. Əməliyyat nəticəsində yüzlərlə bank kartının müxtəlif kibercinayətlərdə istifadə edildiyi müəyyən edilib.

Faktlarla bağlı Baş İdarədə araşdırmalar davam edir.

DİN bir daha vətəndaşlara müraciət edərək xəbərdarlıq edir: əgər bank kartınızdan şübhəli məqsədlər üçün istifadə olunduğunu aşkarlamısınızsa, hesabınıza mənbəyi bilinməyən vəsait köçürülübsə və ya sizə kart məlumatlarınızı satmaq təklif edilirsə, dərhal polisə məlumat verin.