İsrail-Azərbaycan texnoloji əməkdaşlığı genişləndirilir

İsrail və Azərbaycan süni intellekt (AI) sahəsində əməkdaşlıq üçün memorandum imzalayıb. Sənəd İsrailin Milli Süni İntellekt İdarəsinin rəhbəri briqada generalı Erez Eskel və Azərbaycanın rəqəmsal inkişaf və nəqliyyat naziri Rəşad Nəbiyev tərəfindən rəsmiləşdirilib.

Müqavilənin əsas məqsədi iki ölkə arasında texnoloji və elmi əməkdaşlığı genişləndirməkdir. Memorandum çərçivəsində əsas diqqət yüksək performanslı hesablama infrastrukturunun qurulmasına, mühüm mülki sektorlarda süni intellekt tətbiqlərinin inkişafına və birgə tədqiqat layihələrinin aparılmasına yönələcək.

Mərasimdə İsrailin Baş naziri Benyamin Netanyahu da iştirak edib. Çıxışında o, süni intellekti yalnız gələcəyin deyil, həm də indiki dövrün mühüm aləti kimi dəyərləndirib: “Biz AI sahəsində qabaqcıl ölkələr arasında yerimizi qoruyub saxlamalıyıq və birlikdə daha çox uğurlu layihələr həyata keçirə bilərik. Bu memorandum Azərbaycanla strateji əməkdaşlığımızı daha da möhkəmləndirəcək.”

Tərəflər vurğulayıblar ki, imzalanmış sənəd regional əməkdaşlıq üçün geniş imkanlar yaradacaq, iqtisadi tərəqqi, elmi inkişaf və texnoloji layihələrdə birgə təşəbbüsləri dəstəkləyəcək.