İranda etirazlar: ölənlərin sayı 5 min nəfərə çatdı

İranda baş verən etirazlarda ölənlərin sayı 5 min nəfərə çatıb
İranın müxtəlif bölgələrində keçirilən genişmiqyaslı etirazlar zamanı ölənlərin ümumi sayı təxminən 5 min nəfər olaraq qeyd olunur. Onlardan təxminən 500 nəfəri təhlükəsizlik qüvvələrinin əməkdaşlarıdır.

“Reuters” agentliyinin məlumatına görə, adının açıqlanmasını istəməyən rəsmi şəxs hakimiyyət orqanlarının bu rəqəmi təsdiqlədiyini bildirib. O, həmçinin etirazlar zamanı silahlı üsyançı və terrorçu qrupların günahsız vətəndaşlara qarşı hərəkətlərinə diqqət çəkib.

Rəsmi mənbələr qeyd edir ki, ən ağır qarşıdurmalar və yüksək ölüm halları separatçı fəaliyyətin aktiv olduğu İranın şimal-qərb bölgələrində qeydə alınıb.

Eyni zamanda, İran İnsan Haqları Fəalları Xəbər Agentliyi ötən gün etirazlarda ölənlərin sayını 3 308 nəfər olaraq açıqlayıb. Agentliyin məlumatına görə, ölkə üzrə 24 mindən çox etirazçı saxlanılıb.