İran və Rusiya Oman dənizində birgə hərbi təlimlər keçirəcək

İran və Rusiya silahlı qüvvələri fevralın 19-da Oman dənizi və Şimali Hind okeanı sahələrində, xüsusən Bəndər Abbas yaxınlığında birgə hərbi təlimlər həyata keçirəcək.

Bu barədə məlumatı İranın Tasnim agentliyi yayıb.

İranın vitse-admiralı Həsən Maksudlu bildirib ki, təlimlərin əsas məqsədi Oman dənizi və Şimali Hind okeanında təhlükəsizliyi təmin etmək və sabit dəniz əməkdaşlığını gücləndirməkdir. O qeyd edib ki, təlimlər həm də iki ölkənin donanmaları arasında birgə əməliyyat bacarıqlarının inkişaf etdirilməsinə xidmət edir.

Vitse-admiral əlavə edib ki, təlimlər çərçivəsində dəniz təhlükəsizliyini təhdid edən hallara qarşı birgə əməliyyatlar keçiriləcək. Xüsusən ticarət gəmiləri və neft tankerlərinin qorunması, həmçinin dəniz terrorizminə qarşı mübarizə əsas məqsədlərdən biridir.