Ermənistan parlamentində gərginlik artıb

Ermənistan Milli Məclisində müxalifət və parlament rəhbərliyi arasında 44 günlük müharibəyə dair komissiya hesabatının təqdimatı məsələsi mübahisəyə səbəb olub.

Müxalifət blokundan millət vəkili Geqam Manukyan soruşub ki, parlament komissiyasının hesabatı açıq şəkildə təqdim olunacaqmı, yoxsa məxfi qalacaq. Buna cavab olaraq spiker Alen Simonyan bildirib ki, deputatlar hesabatla tanış ola bilər, lakin sənəddəki məxfi məlumatlar səbəbindən onun təqdimatı iclas zalında məhdudlaşdırılıb.

Simonyan həmçinin müxalifət deputatlarını hesabatı oxumağa çağırıb və bildirib ki, bu günə qədər yalnız bir neçə millət vəkili sənədlə tanış olub. Manukyan isə hesabatın plenar iclasda nəzərdən keçirilməsini tələb edib və sənədin qapalı və ya açıq formada təqdim edilməsinin əsas məsələ olmadığını vurğulayıb.

Bundan əvvəl spiker parlament komissiyasının hesabatını gündəliyə daxil etməmək qərarını açıqlamışdı. Hadisələr parlamentdə 44 günlük müharibə ilə bağlı sənədin açıqlanmasının hələ də mübahisəli mövzu olduğunu göstərir.