Donald Tramp: İrana qarşı əməliyyatlar davam edir

Donald Tramp İran istiqamətində genişmiqyaslı hərbi əməliyyatların davam etdiyini bəyan edib. O, döyüşlər zamanı həyatını itirən amerikalı hərbçilərin ailələrinə başsağlığı verərək onların kədərini bölüşdüyünü bildirib.

Prezident qeyd edib ki, bu gün həlak olan dörd hərbçinin xatirəsi anılır və ailələrinə dəstək göstərilir. Onun sözlərinə görə, əməliyyatların əsas məqsədi ABŞ vətəndaşları üçün təhlükə hesab edilən rejimi zərərsizləşdirməkdir.

Tramp Vaşinqtonun prioritetlərini də açıqlayıb. O bildirib ki, ilk növbədə İranın raket potensialı hədəfə alınır və bu imkanların sıradan çıxarılması istiqamətində tədbirlər görülür. Bundan əlavə, İranın hərbi-dəniz qüvvələrinin zəiflədildiyi və artıq bir neçə gəminin döyüş qabiliyyətinin aradan qaldırıldığı vurğulanıb. Prezident həmçinin Tehranın nüvə silahı əldə etməsinin qarşısının alınmasının ABŞ üçün prinsipial məsələ olduğunu deyib və İranın xaricdə silahlı qruplara dəstəyinin dayandırılmasının hədəfləndiyini bildirib.

ABŞ lideri əlavə edib ki, nüvə silahına malik İran Vaşinqton üçün qəbuledilməzdir və mövcud vəziyyətin müdaxilə üçün mühüm fürsət olduğunu qeyd edib. Onun sözlərinə görə, əməliyyatların ilkin mərhələsi üçün bir neçə həftəlik müddət nəzərdə tutulsa da, zərurət yaranarsa, hərbi fəaliyyət daha uzun davam etdirilə bilər.