Dağlıq və dağətəyi rayonlarda qar yağışı müşahidə olunur

Dekabrın 26-sı saat 09:00-a olan məlumata görə, ölkə ərazisində hava şəraiti arabir yağıntılı keçib, bəzi bölgələrdə yağıntı güclü xarakter alıb. Milli Hidrometeorologiya Xidmətinin məlumatına əsasən, dağlıq və dağətəyi rayonlarda qar yağışı qeydə alınıb.

Yağan qarın hündürlüyü Zaqatalanın Əlibəy ərazisində 10 sm, Kəlbəcər, Laçın və Qubadlıda 7 sm, Daşkəsən və Qusarın Laza kəndində 5 sm, Göygöldə 4 sm olub. Xaltan, Qaxın Sarıbaş kəndi və Qobustanda qar örtüyü 3 sm, Şəki (Kişçay), Qəbələ, Altıağac və Şuşada 2 sm, İsmayıllı, Şamaxı, Biləsuvar, Yardımlı, Ağdam, Lerik, Gəncə, Şəmkir, Gədəbəy, Quba, Oğuz, Xankəndi və Xocalıda isə 1 sm təşkil edib.

Düşən yağıntının miqdarı Astarada 24 mm, Lənkəranda 20 mm, Balakəndə 7 mm, Bakıda və Abşeron yarımadasında 5 mm ölçülüb. Tərtərdə 3 mm, Bərdə, Naftalan və Göyçayda 2 mm, Yevlax, Mingəçevir, Kürdəmir, Şabran, Lerik və Şamaxıda isə 1 mm yağıntı qeydə alınıb.

Dekabrın 25-də bir sıra ərazilərdə şimal-qərb küləyi əsib. Küləyin maksimal sürəti Bakıda və Abşeron yarımadasında 25 m/s, Şahdağ və Neftçalada 20 m/s, Goranboyda 19 m/s, Salyan, Mingəçevir, Naftalan və Daşkəsəndə 18 m/s, Şirvanda isə 15 m/s-ə çatıb.

Sədərək, Şərur, Quba, Qusar, Xaltan, Şabran, Gəncə, Daşkəsən, Qaxın Sarıbaş kəndi, Balakən, Şəki, Yevlax, Zərdab, İmişli, Sabirabad və Lerikdə duman müşahidə olunur, bəzi ərazilərdə görünüş məsafəsi 200 metrədək məhdudlaşıb.

Havanın minimal temperaturu Bakıda və Abşeron yarımadasında 4 dərəcəyədək isti, Aran rayonlarında 3 dərəcəyədək isti, Naxçıvan Muxtar Respublikasında 9 dərəcəyədək şaxta, dağlıq ərazilərdə isə 10 dərəcəyədək şaxta qeydə alınıb.