Co Baydenin pensiya təminatı prezidentlik maaşını üstələyir

ABŞ-ın sabiq prezidenti Co Baydenin aldığı illik pensiya və dövlət təminatı onun prezident vəzifəsində çalışdığı dövrdəki rəsmi maaşdan yüksəkdir.

Mövcud məlumatlara əsasən, Baydenin müxtəlif pensiya fondları və vergi güzəştləri hesabına illik gəliri təxminən 417 min dollar təşkil edir. Bu məbləğ onun prezidentlik müddətində aldığı əməkhaqqından çoxdur.

Yüksək pensiya təminatı Baydenin uzunmüddətli siyasi fəaliyyəti ilə bağlıdır. O, 44 il ABŞ Senatında çalışıb, daha sonra vitse-prezident və prezident vəzifələrini icra edib. Hazırda Bayden həm Konqres üzvləri, həm də keçmiş prezidentlər üçün nəzərdə tutulan iki ayrı fond üzrə ödənişlər alır.

Ekspertlərin qiymətləndirməsinə görə, mövcud qaydalara əsasən tətbiq edilən maksimum əməkhaqqının 80 faizlik limiti olmasaydı, Baydenin təkcə senatorluq fəaliyyəti üzrə pensiyası illik 254 min dollardan artıq ola bilərdi. Bundan əlavə, keçmiş prezidentlər üçün nəzərdə tutulan fond vasitəsilə ona hər il təxminən 250 min dollar ödənilir ki, bu da ABŞ Nazirlər Kabineti üzvlərinin maaşına bərabərdir.

Bayden həmçinin ofis sahəsi, işçi heyəti və texniki təminat daxil olmaqla əlavə dövlət resurslarından istifadə edir. 2026-cı il üçün bu məqsədlə ayrılan vəsaitin 1,5 milyon dolları keçdiyi bildirilir ki, bu da digər keçmiş prezidentlər üçün ayrılan xərclərlə müqayisədə daha yüksəkdir.

Mütəxəssislər Baydenin pensiya və təminat paketinin hüquqi baxımdan qanuni olduğunu, lakin bu vəziyyətin gələcəkdə presedent yarada biləcəyini qeyd edirlər. Prezidentlərin pensiya və müavinətlərinin məhdudlaşdırılması ilə bağlı qanunvericilik təşəbbüsləri əvvəlki illərdə Konqresdə müzakirə edilsə də, indiyədək qəbul edilməyib.

Hazırda bəzi ABŞ qanunvericiləri gələcək prezidentlər üçün bu cür yüksək dövlət təminatlarının normaya çevrilməsinin qarşısını almaq məqsədilə mümkün islahatları müzakirə edirlər.