Azərbaycanın Qəzza missiyasına qoşulmama səbəbləri

Azərbaycan xarici işlər naziri Ceyhun Bayramov Qəzza zolağında sülhməramlı missiyaya qoşulmaqla bağlı məsələlərə münasibət bildirib. Nazir açıqlayıb ki, Azərbaycan bu təşəbbüsə dəvət olunub və region ölkələri ilə yaxşı əlaqələrə malik nadir dövlətlərdən biridir.

“Beynəlxalq sabitlik qüvvələrində iştirak imkanımız var, amma hələlik qərar verilməyib, çünki bir sıra sualların cavabı tam aydın deyil”, – Bayramov vurğulayıb.

Məlumata görə, ABŞ ilkin siyahıda Azərbaycan və İndoneziyanı Qəzzada sülhməramlı qüvvələrə namizəd göstərib. Lakin Bakının hələ missiyaya qoşulub-qoşulmaması dəqiq deyil. Azərbaycanın əsas şərtləri missiyanın yalnız humanitar xarakter daşıması və silahlı əməliyyatlarla əlaqələndirilməməsidir.

Eyni zamanda, missiyanın mandatının nə qədər geniş olacağı da Azərbaycan üçün mühüm faktor hesab olunur: bu qüvvələr yalnız Qəzza ilə məhdudlaşacaq, yoxsa bütün Fələstin regionunu əhatə edəcək.

Daxili ictimai-siyasi vəziyyət də qərarın verilməsində vacib rol oynayır. 30 ilə yaxın davam edən Ermənistan münaqişəsindən sonra ölkə daxilində cəmiyyət artıq savaşlardan yorulub və uzaq məsafədə riskli əməliyyatlara qoşulmaq hər kəs tərəfindən birmənalı qarşılanmaya bilər.

Qeyd edək ki, Azərbaycan əvvəllər NATO çərçivəsində Əfqanıstanda beynəlxalq missiyalarda iştirak edib, amma Qəzza üçün tələb olunan logistik dəstək və resurs həcmi hələ müzakirə olunur. Hazırda yalnız İndoneziya missiyaya qoşulmağa açıq olduğunu bəyan edib və 20 min hərbçi göndərə biləcəyini bildirib.