Azərbaycanda muzdla işləyənlərin sayı 1,8 milyonu ötüb

2025-ci il dekabrın 1-i vəziyyətinə ölkə iqtisadiyyatında muzdla çalışan işçilərin sayı 1 797,4 min nəfər olub. Onlardan 869 min nəfəri dövlət sektorunda, 928,4 min nəfəri isə qeyri-dövlət sektorunda fəaliyyət göstərib.

Dövlət Statistika Komitəsinin məlumatına görə, muzdla işləyənlərin sahələr üzrə bölgüsü belədir: 18,6%-i ticarət və nəqliyyat vasitələrinin təmiri, 18,2%-i təhsil, 14,0%-i sənaye, 8,5%-i səhiyyə və sosial xidmətlər, 6,7%-i tikinti, 6,3%-i dövlət idarəetməsi və müdafiə, 4,5%-i nəqliyyat və anbar təsərrüfatı, 3,9%-u peşə, elmi və texniki fəaliyyət, 2,4%-ü kənd təsərrüfatı, meşə təsərrüfatı və balıqçılıq, 2,3%-ü maliyyə və sığorta fəaliyyəti, qalan 14,6% isə iqtisadiyyatın digər sahələrində çalışır.

2025-ci ilin yanvar-noyabr aylarında muzdla işləyənlərin orta aylıq nominal əməkhaqqı əvvəlki ilin müvafiq dövrünə nisbətən 9,3% artaraq 1 089,2 manat təşkil edib. Ən yüksək əməkhaqqı mədənçıxarma sənayesi, maliyyə və sığorta fəaliyyəti, informasiya və rabitə, peşə, elmi və texniki fəaliyyət, eləcə də nəqliyyat və anbar təsərrüfatı sahələrində qeydə alınıb.