Azərbaycanda çoxmərtəbəli binalarda qaz mərhələli şəkildə qadağan olunur.

Azərbaycanda 2035-ci ilə qədər çoxmərtəbəli binalarda təbii qazla çalışan avadanlıqların mərhələli şəkildə istifadədən çıxarılması planlaşdırılır. Bu avadanlıqların bərpa olunan elektrik enerjisi ilə işləyən sistemlərlə əvəz olunması “BMT İqlim Dəyişikliyi üzrə Çərçivə Konvensiyası” çərçivəsində hazırlanan “Milli Səviyyədə Müəyyənləşdirilmiş Töhfələr” (NDC 3.0) hesabatında öz əksini tapıb.

Sənədə əsasən, binalarda elektriklə işləyən hava-su tipli istilik nasosları və elektrik plitələrinin tətbiqi nəzərdə tutulur. Yüksək səmərəliliyə malik istilik nasosları həm məişət istiliyini, həm də isti su təminatını qarşılayaraq enerji qənaətinə mühüm töhfə verəcək.

Mövzu ilə bağlı Milli Məclisin Təbii ehtiyatlar, energetika və ekologiya komitəsinin üzvü Rövşən Muradov bildirir ki, çoxmərtəbəli binalarda qaz avadanlıqlarının istifadəsinin məhdudlaşdırılması ilk növbədə təhlükəsizlik baxımından vacibdir. Onun sözlərinə görə, son günlər baş verən yanğın və qəza halları məsələnin aktuallığını daha da artırıb.

Deputat xatırladıb ki, sovet dövründə müəyyən mərtəbədən yuxarı binalara qaz verilmirdi və yüksək mərtəbələr tamamilə elektriklə təmin olunurdu. Hazırda isə Bakının bir çox hündürmərtəbəli binaları qazla təchiz olunur, lakin elə binalar da var ki, tam elektrik sistemi ilə işləyir və burada isitmə-soyutma mərkəzləşdirilmiş qaydada həyata keçirilir. Bununla belə, sakinlər üçün xidmət haqları kifayət qədər yüksəkdir.

Muradov deyib ki, yeni qəbul olunmuş istilik təchizatı haqqında qanun da məhz bu istiqamətdə addımların atılmasını hədəfləyir:
“Binaların ümumi qazanxanalar vasitəsilə qızdırılması həm təhlükəsizlik, həm ekologiya, həm də xərclərin optimallaşdırılması baxımından daha səmərəlidir. Bu halda hər mənzildə ayrıca kombi saxlamağa, onun təmir və digər əlavə xərclərinə ehtiyac qalmır”.

Deputat əlavə edib ki, hər nə qədər qaz daha ucuz olsa da, təhlükəlilik və havaya yayılan emissiyalar ciddi problemlər yaradır:
“Elektrik əsaslı sistemlərin qiyməti və aylıq xərcləri yüksəkdir, lakin uzunmüddətli dövrdə həm ekologiya, həm də təhlükəsizlik baxımından daha məqsədəuyğun addımlar atılmalıdır. Təbii qazla işləyən avadanlıqların mərhələli şəkildə əvəzlənməsi tamamilə düzgün yanaşmadır”.