Azərbaycan qazına qoyulan qadağa Milli Məclisdə müzakirəyə çıxarıldı

Milli Məclisin plenar iclasında Azərbaycanın enerji siyasəti və qaz ixracına dair mühüm məsələlər gündəmə gətirilib. Ədalət, Hüquq, Demokratiya (ƏHD) Partiyasının sədri, millət vəkili Qüdrət Həsənquliyev həmkarı Səməd Seyidova ölkəmizin qaz satışına bəzi maneələrin yaradılması ilə bağlı sual ünvanlayıb.

Deputat qeyd edib ki, ABŞ-ın müəyyən addımları Yunanıstan vasitəsilə Azərbaycan qazının Ukraynaya satışını çətinləşdirib. O, həmkarından bu məsələyə dair məlumatın olub-olmadığını soruşub və parlamentdə məsələni müzakirəyə çıxarmağı vacib hesab edib.

Beynəlxalq münasibətlər və parlamentlərarası əlaqələr komitəsinin sədri Səməd Seyidov isə bildirib ki, bu məsələ çox əhəmiyyətlidir və Azərbaycan üçün diqqətlə izlənilməlidir. O vurğulayıb ki, ölkəmiz hazırda ABŞ və digər tərəfdaşlarla münasibətlər çərçivəsində enerji təhlükəsizliyinin təminatında strateji rola malikdir. Seyidov həmçinin Aralıq dəhlizi, neft-qaz sektorundakı islahatlar və qonşu ölkələrlə enerji əməkdaşlığı barədə aparılan görüşlərin nəticələrinə dair geniş məlumat verib.

Komitə sədri əlavə edib ki, Azərbaycan öz enerji siyasətini milli maraqlar və beynəlxalq əməkdaşlıq prinsipləri əsasında həyata keçirir, bununla da Avropanın enerji təhlükəsizliyində önəmli pay sahibi olur.