Azərbaycan nümayəndə heyəti İrəvanda – Sülh dialoqunda yeni mərhələ

Ermənistan Baş naziri Administrasiyasının rəhbəri Araik Arutyunyan İrəvanda keçirilən “Orbeli: Sülh və çoxtərəfli əməkdaşlığın qurulması” Forumunda bildirib ki, sülhün alternativi yoxdur və bu, təkcə dayanıqlı inkişafın məqsədi deyil, həm də ilkin şərtidir.

O qeyd edib ki, avqustun 8-də Vaşinqtonda Ermənistan və Azərbaycan arasında sülh və dövlətlərarası münasibətlərin qurulması haqqında sazişin paraflanması region üçün dönüş nöqtəsi olub:
“Bu hadisə davamlı sülh və qarşılıqlı etimadın yeni səhifəsinin açılması üçün real əsaslar yaradıb. Sülh prosesi artıq ideoloji mərhələni keçərək əməli nəticələr verməkdədir. Bu gün Azərbaycan və Türkiyədən vətəndaş cəmiyyəti və media nümayəndələrinin forumda iştirakı bunun göstəricisidir”.

Arutyunyanın sözlərinə görə, regionda yolların açılması, sülhün bərqərar olması və yaranmış tarixi fürsətin reallaşdırılması həm sabitliyə, həm də xalqlar arasında münasibətlərin inkişafına ciddi töhfə verəcək:
“Əminik ki, sülh və açıq ünsiyyət Cənubi Qafqazı bazarları, mədəniyyətləri və xalqları birləşdirən qlobal körpüyə çevirə bilər”.

Qeyd edək ki, forum avqustun 8-də Vaşinqtonda Azərbaycan və Ermənistan arasında sülh sazişinin paraflanmasından sonra Cənubi Qafqazda yaranmış yeni vəziyyətin müzakirəsinə həsr olunub. Ermənistan Baş naziri Nikol Paşinyan da tədbirdə çıxış edib.