Azərbaycan İrana qarşı mümkün hücumdan narahatdır

ABŞ-ın İrana mümkün zərbəsi ilə bağlı yaranan qeyri-müəyyənlik Azərbaycanda narahatlıq doğurur, lakin Bakı bu məsələni Vaşinqtonla müzakirə etməyib.

Bu barədə Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev “The National” nəşrinə açıqlamasında bildirib.

Hacıyev qeyd edib ki, mövcud vəziyyət proqnozlaşdırıla bilməz və bununla bağlı mümkün riskləri tam şəkildə qiymətləndirmək çətindir. Eyni zamanda, Azərbaycan bu narahatlıqları ABŞ tərəfinə çatdırmayıb və Vaşinqton da məsələyə dair Bakı ilə əlaqə saxlamayıb.

Prezidentin köməkçisi vurğulayıb ki, son günlərdə Azərbaycan rəsmiləri iranlı həmkarları ilə müzakirələr aparıblar və İrandakı təhlükəsizlik vəziyyəti hazırda Azərbaycanın dərhal müdaxiləsini tələb etmir. O, bildirib ki, Bakı hər zaman digər dövlətlərin daxili işlərinə qarışmır.

Hikmət Hacıyev həmçinin əlavə edib ki, Cənubi Qafqazın enerji baxımından zəngin olan Azərbaycan özünü beynəlxalq münaqişələrin ortasında hiss edir: “Bir tərəfdə Rusiya-Ukrayna müharibəsi, digər tərəfdə İsrail-İran qarşıdurması və ABŞ-ın bu prosesdə rolu var.”