Ayın Səthi Paslanır – Sirli Səbəb Yer Küləyi İlə Bağlıdır

Alimlərin son araşdırmalarına görə, Ayın səthi paslanır və bunun əsas səbəbi Yer kürəsindən gələn küləklərdir. “Geophysical Research Letters” jurnalında dərc olunan tədqiqatda bildirilir ki, Yer atmosferindən gələn oksigen hissəcikləri Ay torpağındakı minerallarla qarşılıqlı təsirə girərək hematit – yəni pas əmələ gətirir.

Makao Elm və Texnologiya Universitetindən planetşünas Şix Xin açıqlayıb: “Bu kəşf planetimizlə Ay arasındakı əlaqəni anlamaqda yeni bir səhifə açır.”

Tədqiqat göstərir ki, Ay və Yer Günəş küləyinə – ulduzumuzdan gələn hissəcik axınına tez-tez məruz qalır. Hər ay təxminən beş gün Ay və Yer Günəşlə eyni xəttdə olur və Ay bu zaman Günəş küləyinə əlavə olaraq Yerin atmosferindəki hidrogen, oksigen, azot və digər ionları qəbul edir. Bu hissəciklər Aya düşərək torpağın üst qatlarına nüfuz edir və kimyəvi reaksiyalar baş verir.

Kəşf Hindistanın “Chandrayaan-1” missiyasının Ay kraterlərində aşkar etdiyi hematit məlumatlarına əsaslanır. Hematit dəmirlə zəngindir və normal halda su və oksigenin qarşılıqlı təsiri ilə əmələ gəlir. Ayın rütubətsiz mühitində oksigenin mənbəyi uzun müddət sirr olaraq qalmışdı, lakin yeni laboratoriya sınaqları göstərir ki, oksigen Yer küləyinin vasitəsilə Aya çatır və pasın yaranmasına səbəb olur.