Ukrayna ordusu Rusiyanın enerji və hərbi obyektlərini hədəfə aldı

Ukrayna ordusu Rusiyanın enerji və hərbi infrastrukturuna yönəlmiş yeni zərbələr həyata keçirib.

Ukrayna Müdafiə Qüvvələrinin məlumatına görə, yanvarın 9-dan 10-na keçən gecə Rusiya Federasiyasının Volqoqrad vilayətində yerləşən strateji əhəmiyyətli neft anbarı hədəfə alınıb. Hücumlar eyni zamanda Ukraynanın müvəqqəti işğal altında olan ərazilərində yerləşən bir neçə obyektə də yönəlib.

Ukrayna Silahlı Qüvvələri Baş Qərargahının teleqram kanalında yayılan açıqlamada bildirilib ki, sözügedən əməliyyatlar Rusiya ordusunun hücum potensialını zəiflətmək məqsədi daşıyır. Zərbə Volqoqrad vilayətində yerləşən “Jutovskaya” neft anbarına endirilib və bu obyektin Rusiya hərbi birləşmələrinin yanacaq təminatında mühüm rol oynadığı vurğulanıb. Dəymiş ziyanın həcmi hazırda dəqiqləşdirilir.

Bundan əlavə, müvəqqəti işğal altında olan Zaporojye bölgəsində Rusiya ordusunun 19-cu motoatıcı diviziyasına məxsus pilotsuz uçuş aparatlarının saxlandığı anbar vurulub. Donetsk vilayətinin Pokrovsk rayonu yaxınlığında isə dronların idarə olunması üçün istifadə edilən məntəqə hədəf alınıb.

Açıqlamada qeyd olunur ki, Donetsk vilayətində digər hərbi obyektlərə də zərbələr endirilib. Bu hədəflər arasında 76-cı Hava-Desant Hücum Diviziyasının şəxsi heyətinin cəmləşdiyi ərazi, həmin diviziyanın tank batalyonunun bir hissəsinə aid komanda-müşahidə məntəqəsi və 41-ci Ordunun komanda məntəqəsi yer alır.

Rusiya tərəfinin canlı qüvvə və texnika itkiləri ilə bağlı məlumatlar dəqiqləşdirilir.