Tibb işçiləri üçün yenilik

Azərbaycan Respublikasının Nazirlər Kabineti praktik tibb və əczaçılıq sahəsində fəaliyyət göstərən şəxslərin sertifikasiyası ilə bağlı yeni qaydanı təsdiqləyib. Qaydaya əsasən, sertifikasiya imtahanının iştirak haqqı ali təhsilli tibb işçiləri üçün 35 manat, orta ixtisaslılar üçün isə 25 manat müəyyən edilib.

Davamlı peşəkar inkişaf üzrə minimum kredit həcmi isə 5 il ərzində 250 kredit olaraq təsbit olunub. Yeni qaydalar 2010-cu ildə qəbul edilmiş sertifikasiya qərarlarını ləğv edir və hazırda qüvvədə olan sertifikatların yenilənməsi prosedurunu müəyyənləşdirir.

Milli Məclisin Səhiyyə komitəsinin üzvü Müşfiq Məmmədli bildirib ki, sertifikasiya həkimlərin və tibb işçilərinin bilik və bacarıqlarını müasir tələblərə uyğunlaşdırmaq, yeni tibbi metod və protokollardan xəbərdar olmasını təmin etmək üçündür.

Onun sözlərinə görə, kurslar və təlimlər vasitəsilə 5 il ərzində 250 bal toplayan tibb işçiləri artıq sertifikasiya imtahanından azad olunacaqlar. Bu dəyişiklik həm stres və texniki problemləri aradan qaldırır, həm də tibb işçilərinin peşəkar inkişafını təmin edir.

Müşfiq Məmmədli qeyd edib: “Bu addım tibb sahəsində inqilabi yenilikdir, çünki həkimlər və tibb işçiləri müasir texnologiyalardan istifadə edəcək, konfrans və simpoziumlarda iştirak edəcək, elmi ədəbiyyata çıxış əldə edəcək və bacarıqlarını inkişaf etdirəcəklər.”