Taksi sürücüləri üçün vacib yenilik

Dövlət İmtahan Mərkəzi (DİM) taksi minik avtomobillərinin sürücüləri üçün növbəti imtahan tarixini açıqlayıb. İmtahan noyabrın 13-də keçiriləcək.

Hazırlıq keçmiş və şəhadətnamə almaq istəyən şəxslərin məlumatları artıq DİM-ə təqdim olunub. Namizədlər 17 oktyabr saat 12:00-dan 31 oktyabr saat 18:00-dək imtahana qeydiyyatdan keçməlidirlər.

Qeydiyyat prosesi DİM-in rəsmi internet səhifəsində — ekabinet.dim.gov.az ünvanında aparılır. Sürücülər “Şəxsi kabinet” yaradaraq “Taksi minik avtomobillərinin sürücülərinin etik davranış və avtomobil nəqliyyatı ilə sərnişin daşımalarını tənzimləyən normativ hüquqi aktlara dair test imtahanı” xidmətini seçməlidirlər.

İmtahanda iştirak ödənişlidir – hər bir namizəd “Şəxsi kabinet”dəki hesabına 35 manat əlavə etməlidir. Qeydiyyatdan keçib imtahana qatılmayan şəxslərə ödəniş geri qaytarılmayacaq.

Test imtahanı DİM-in elektron imtahanlar korpusunda (Bakı şəhəri, Binəqədi rayonu, S.S. Axundov küçəsi, 50) keçiriləcək. İmtahana buraxılış vərəqəsini sürücülər qeydiyyat başa çatdıqdan sonra, imtahana 3 gün qalmış sayt vasitəsilə çap edə biləcəklər.

İmtahan 1 saat davam edəcək və 20 test tapşırığından ibarət olacaq. Suallar Rəqəmsal İnkişaf və Nəqliyyat Nazirliyinin müəyyən etdiyi xüsusi proqram əsasında hazırlanıb.

Hər düzgün cavab 1 balla qiymətləndiriləcək, səhv cavablar nəticəyə təsir etməyəcək. 10 və daha çox bal toplayan sürücülər imtahanı uğurla keçmiş sayılacaq və onlara 7 il müddətinə etibarlı şəhadətnamə təqdim olunacaq.