Rusiya razılaşmaları pozdu

Ukrayna Prezidenti Volodimir Zelenski Rusiya tərəfinin enerji və kritik infrastruktur sahəsindəki öhdəlikləri pozaraq müharibəni davam etdirməyə üstünlük verdiyini açıqlayıb. Bu barədə o, NATO-nun baş katibi Mark Rutte ilə birgə keçirilən mətbuat konfransında danışıb.

Zelenskinin sözlərinə görə, ABŞ Prezidenti danışıqlar qruplarının görüşü öncəsi Rusiyanı enerji obyektlərinə və kritik infrastruktura bir həftəlik zərbə etməməyə çağırmışdı. Lakin prezident bildirib ki, bu razılaşma faktiki olaraq yerinə yetirilməyib.

“Zərbələr cümə gecəsindən başlayaraq davam edib. Bu ya Rusiya tərəfinin ‘bir həftə’ anlayışını dörd gün kimi başa düşməsi deməkdir, ya da onlar müharibəni açıq şəkildə davam etdirməyə qərar veriblər”, – deyə Zelenski vurğulayıb.

O əlavə edib ki, Rusiya hücumları xüsusilə havaların sərtləşdiyi, temperaturun bəzi bölgələrdə mənfi 20 dərəcəyə qədər düşdüyü dövrdə həyata keçirib. Prezidentin sözlərinə görə, sonrakı hücumlar ballistik raketlərin istifadəsi baxımından rekord xarakter daşıyır və ABŞ-la razılaşdırılmış öhdəliklərin pozulması deməkdir. “Bunun müvafiq nəticələri olmalıdır”, – deyə Zelenski qeyd edib.

Ukrayna Silahlı Qüvvələrinin Hərbi Hava Qüvvələrinin məlumatına görə, fevralın 3-nə keçən gecə Rusiya 71 fərqli raket və 450 zərbə dronundan istifadə edərək Ukraynaya qarşı kombinə edilmiş hücum həyata keçirib.