Paşinyan Ermənistan Ordusundakı maaşları açıqladı

Ermənistan Baş naziri Nikol Paşinyan Ordunun 34-cü ildönümü münasibətilə Silahlı Qüvvələrə təbrik mesajı ünvan edib. Ölkədə 28 yanvar Ordu Günü kimi qeyd olunur.

Paşinyan bildirib ki, son illərdə Ermənistan ordusuna ciddi sərmayələr yatırılıb və bir sıra struktur islahatları həyata keçirilib. Məcburi hərbi xidmət müddəti 24 aydan 18 aya endirilib ki, bu da xidmət şərtlərini xeyli yaxşılaşdırır.

Baş nazirin açıqlamasına görə, hərbçilərin maaşları əhəmiyyətli şəkildə artırılıb. Sıravi əsgərlər ayda təxminən 700.000 dram alır, zabitlərin əmək haqqı isə 1 milyon dramdan başlayaraq 1,5 və ya hətta 2 milyon dramı keçə bilir. Paşinyan bunu hərbçilərin, onların ailələrinin və cəmiyyətin sosial təminatı baxımından vacib addım kimi qiymətləndirib.

Paşinyan həmçinin 6 oktyabr 2022-ci ildə Praqada əldə olunan dördtərəfli razılaşmaya istinad edib. Razılaşmaya görə, Ermənistan və Azərbaycan 1991-ci il Alma-Ata Bəyannaməsi çərçivəsində bir-birinin ərazi bütövlüyünü və suverenliyini tanıyır. Baş nazir vurğulayıb ki, Ermənistan ordusunun əsas vəzifəsi yalnız ölkənin beynəlxalq səviyyədə tanınmış 29.743 kvadrat kilometrlik ərazisini müdafiə etmək və sülhməramlı missiyalarda iştirak etməkdir.

Paşinyan əlavə edib ki, Ermənistan və Azərbaycan arasında mövcud sülh, region üçün ən etibarlı təhlükəsizlik təminatıdır.