Müharibənin acı statistikası

Amerikalı ekspertlərin qiymətləndirməsinə görə, Rusiya ilə Ukrayna arasında davam edən müharibə indiyədək təxminən iki milyon insan itkisinə səbəb olub. Bu barədə Strateji və Beynəlxalq Araşdırmalar Mərkəzinin (CSIS) yaydığı hesabatda qeyd olunur.

Sənəddə bildirilir ki, 2025-ci ilin sonuna qədər Ukrayna tərəfinin ümumi itkilərinin 600 minə, Rusiyanın isə təxminən 1,2 milyon nəfərə çatdığı ehtimal edilir.

Mütəxəssislər vurğulayırlar ki, bu rəqəmlər İkinci Dünya Müharibəsindən sonra baş vermiş heç bir silahlı münaqişə ilə müqayisə edilə biləcək səviyyədə deyil və misilsiz dərəcədə yüksəkdir.

Hesabatda itkilər anlayışına həm ölənlərin, həm də yaralananların daxil edildiyi qeyd olunur. Mövcud hesablamalara əsasən, Ukrayna ordusunda ölənlərin sayı 100–150 min, Rusiya tərəfində isə 275–325 min arasında qiymətləndirilir.