Marsın keçmişi ilə bağlı yeni elmi kəşf

Çinli tədqiqatçılar Marsda təxminən 750 milyon il əvvəl uzunmüddətli su mühitinin mövcud olduğuna dair yeni sübutlar aşkar ediblər. Bu nəticə “Zhurong” mars gəmisinin ötürdüyü məlumatların təhlili əsasında əldə olunub.

Çin Elmlər Akademiyasının Geologiya və Geofizika İnstitutunun alimlərinin araşdırmasına görə, həmin dövrdə Mars səthində təxminən dörd metr qalınlığında çöküntü layı formalaşıb. Bu layın quruluşu və vahidliyi ərazidə suyun davamlı şəkildə mövcud olduğunu göstərir.

Tədqiqatın rəhbəri Liu Yike bildirib ki, çöküntü qatının xüsusiyyətləri onun külək fəaliyyəti və ya vulkanik proseslər nəticəsində yaranması ehtimalını istisna edir. Alimin sözlərinə görə, ən məntiqli izah həmin bölgənin dayaz göl və ya iri göl tipli su hövzəsi olmasıdır.

Araşdırma nəticələri onu da göstərir ki, Marsda suyun mövcudluğu əvvəlki elmi ehtimallarla müqayisədə bir neçə yüz milyon il daha uzun sürüb. Bu tapıntı planetin keçmiş iqlimi və potensial yaşayış imkanları ilə bağlı yeni suallar doğurur.