Kosmosda gərginlik artır: Rusiya peyklərə müdaxilə edir

Kosmos artıq təkcə elm və texnologiyanın deyil, həm də hərbi qarşıdurmaların yeni meydanına çevrilir. Böyük Britaniya rəsmiləri Rusiyanın mütəmadi olaraq onların hərbi peyklərinə müdaxilə etdiyini açıqlayıb.

Bu barədə Böyük Britaniyanın Kosmik Komandanlığının rəisi, general-mayor Pol Tedman məlumat verib. O bildirib ki, Rusiya qüvvələri demək olar ki, hər həftə Britaniyanın kosmik fəaliyyətinə mane olmağa çalışır və ölkənin peyklərini yaxından izləyir:

“Peyklərimizin ruslar tərəfindən ardıcıl şəkildə sıxışdırıldığını müşahidə edirik”, – deyə o vurğulayıb.

Hazırda Böyük Britaniya altıya yaxın xüsusi hərbi peykdən istifadə edir. Bu peyklər rabitə və müşahidə sistemlərinin müdafiəsi üçün tıxacların qarşısını alan müasir texnologiyalarla təchiz edilib.

Rusiya Federasiyasının kosmosdakı fəaliyyəti yalnız Britaniya ilə məhdudlaşmır. Almaniyanın müdafiə naziri Boris Pistorius da Rusiyanın Almaniya ordusunun istifadə etdiyi iki “Intelsat” peykini izlədiyini açıqlamışdı.

Buna cavab olaraq, ötən ay Böyük Britaniya və ABŞ kosmosda ilk koordinasiyalı hərbi əməliyyat həyata keçirib. Müdafiə rəsmiləri bu addımı NATO müttəfiqlərinin kosmosda əməkdaşlığının gücləndirilməsi istiqamətində mühüm mərhələ adlandırıblar.