Ermənistanda ilk çikunqunya qızdırması halı qeydə alınıb

Ermənistanda ilk çikunqunya qızdırması halı qeydə alınıb.

Xəstəliklərə Nəzarət və Profilaktika üzrə Milli Mərkəzin məlumatına görə, yoluxma hadisəsi 18 fevralda aşkarlanıb. Xəstə Seyşel adalarında ağcaqanad sancmasından sonra infeksiyaya yoluxub və hazırda vəziyyəti qənaətbəxşdir.

Son dövrlərdə Seyşel adaları, Şri-Lanka, Surinam, Boliviya və Kubada çikunqunya epidemiyaları qeydə alınıb. Xəstəliyin inkubasiya dövrü 2-12 gün davam edir və əsas simptomlara yüksək qızdırma, şiddətli oynaq və əzələ ağrısı, dəri səpgisi və halsızlıq daxildir.

Xəstəlik insandan insana keçmir və onun spesifik müalicəsi yoxdur. Peyvənd geniş yayılmayıb. Risk qruplarına yaşlılar, hamilə qadınlar və xroniki xəstəlikləri olan insanlar daxildir. Ölüm halları nadirdir, yoluxanların təxminən 0,1%-ində baş verir.

İnfeksiyadan qorunmaq üçün ağcaqanad torlarından istifadə etmək, uzunqol və uzun şalvar geyinmək, kovucu vasitələr və digər qoruyucu metodlardan yararlanmaq tövsiyə olunur.

Qeyd edək ki, Rusiyada ilk çikunqunya halı bu ilin fevral ayında qeydə alınıb. 2025-ci ilin sonuna qədər 445 mindən çox təsdiqlənmiş və şübhəli yoluxma halı qeyd olunub. ÜST bildirir ki, virus yeni regionlara yoluxmuş səyahətçilər vasitəsilə və ya yerli ötürülmə ilə yayıla bilər, yayılma riski immunitet zəifliyi və insanların hərəkətliliyinin artması ilə daha da yüksəlir.