Azərbaycan Sülh Şurasına təsisçi üzv kimi qoşuldu

Sülh Şurası (Board of Peace) Azərbaycanı rəsmi olaraq təsisçi üzv kimi qəbul etdiyini açıqlayıb. Bu barədə məlumat təşkilatın sosial media hesabında paylaşılıb.

Paylaşımda Azərbaycana xüsusi həsr olunmuş qarşılama posteri yayımlanıb və ölkəmiz Sülh Şurasının təsisçi üzvlərindən biri kimi təqdim edilib. Oxşar təqdimatlar digər iştirakçı dövlətlər üçün də dərc olunub ki, bu, Şuranın qlobal şəbəkəsinin formalaşmasının əlaməti kimi qiymətləndirilir.

Sülh Şurası ABŞ Prezidenti Donald Trampın təşəbbüsü ilə yaradılıb. Təşkilatın əsas sənədi olan Nizamnamənin imzalanma mərasimi yanvarın 22-də Davosda keçirilən Dünya İqtisadi Forumu çərçivəsində baş tutub. Azərbaycan Prezidenti İlham Əliyev tədbirdə iştirak edərək digər dövlət və hökumət başçıları ilə birlikdə təsis sənədini imzalayıb. Bu addım Azərbaycanı yeni beynəlxalq platformaya qoşulan ilk ölkələrdən birinə çevirib.

Sülh Şurasının əsas məqsədi dövlətlər arasında dialoqu təşviq etmək, diplomatik əməkdaşlığı gücləndirmək və uzunmüddətli sülh təşəbbüslərinə dəstək verməkdir. Təşkilatın sosial media üzərindən yaydığı açıqlamalar beynəlxalq ictimaiyyətə ilk rəsmi müraciətləri kimi qiymətləndirilir.

Davosda keçirilən imzalanma mərasimi və sonrakı açıqlamalar Azərbaycanın Sülh Şurasının formalaşmasında erkən və önəmli rol oynadığını göstərir və ölkənin bu yeni qlobal təşəbbüsün əsas tərəfdaşlarından biri kimi mövqeyini təsdiqləyir.