Azərbaycan Ermənistana 7 600 ton neft məhsulu göndərdi – qiymətlərdə azalma gözlənilir

Azərbaycandan Ermənistana yeni neft məhsulları göndərilib. Daşınan 7 600 ton yükün içərisində 6 100 ton benzin və 1 500 ton dizel yanacağı yer alır. Bu addımın nəticəsində Ermənistan bazarında benzin və dizel qiymətlərinin 1 litr üçün təxminən 80 dram azalacağı gözlənilir.

Ötən il Azərbaycan vasitəsilə Ermənistana həmçinin 6 580 ton taxıl göndərilmişdi – 1 000 tonu Qazaxıstandan, 5 580 tonu isə Rusiyadan daşınıb. Bu ilin 8 yanvar tarixinə olan məlumatlara görə, əlavə 8 485 ton Rusiya taxılı artıq Ermənistana çatdırılıb, 4 103 ton isə hələ yoldadir.

Ermənistanın iqtisadiyyat naziri Gevork Papoyan bildirib ki, neft məhsullarının kütləvi daşınması digər yerli satıcıları da qiymətləri aşağı salmağa təşviq edir. Azərbaycan öncə də daha böyük həcmdə neft məhsulu partiyasını Ermənistana göndərəcəyini açıqlamışdı.