Avroviziya 2026: Mədəniyyət və Siyasi Gərginlik

İtaliyanın dövlət yayım şirkəti RAI, fələstinli ifaçının 2026-cı ildə Vyanada keçiriləcək Avroviziya Mahnı Müsabiqəsində xüsusi şərtlərlə çıxış etməsinə icazə verilməsi üçün Avropa Yayım Birliyinə (EBU) və Avstriyanın dövlət yayım şirkəti ORF-ə rəsmi müraciət ünvanlayıb.

Euronews-un məlumatına görə, bu təşəbbüs RAI idarə heyətinin üç üzvü tərəfindən irəli sürülüb və bir sıra ölkələrdə etirazlara və boykot çağırışlarına səbəb olmuş İsrail iştirakını əhatə edən ictimai müzakirələri balanslaşdırmaq məqsədi daşıyır. Məktubda vurğulanır ki, bu addım siyasi mesaj deyil, sadəcə mədəni təşəbbüs və vətəndaş məsuliyyətinin ifadəsidir: “Musiqinin təcəssüm etdirdiyi inklüzivlik və qardaşlıq prinsiplərini pozmamaq üçün Fələstin Avroviziya səhnəsində xoş qarşılanmalıdır.”

Müraciətin, Festival di Sanremo 2026-da iştirak edəcək və İsrailin iştirakına etiraz olaraq milli seçimdə qalib gəlsə, İtaliyanı müsabiqədə təmsil etməkdən imtina edəcəyini açıqlayan Levante adlı iştirakçının qərarından sonra verildiyi diqqətə çatdırılıb.

RAI Kommunikasiya direktoru Fabrizio Kazinelli bildirib: “Biz vəziyyətə göz yuma bilmədik və müraciət edildiyi kimi mövqeyimizi dərhal bildirdik.”

Qeyd edək ki, ORF əvvəlcədən Fələstin bayrağının 2026-cı il Avroviziya Mahnı Müsabiqəsində qadağan edilməyəcəyini və İsrailə yönəlmiş şüarların səssizləşdirilməyəcəyini açıqlamışdı.