ABŞ valideynlərini qorxudan saxta “Labubu”lar – ölümcül təhlükə xəbərdarlığı

ABŞ-də valideynlərə xəbərdarlıq edilib: son vaxtlar sürətlə yayılan saxta “Labubu” oyuncaqları uşaqlar üçün ciddi təhlükə yaradır.

“Pop Mart” şirkətinin istehsalı olan yumşaq monstr fiqurları bu yay sosial şəbəkələrdə populyarlıq qazanaraq satış rekordları qırıb. Lakin yüksək tələbat səbəbindən bazara çoxlu sayda keyfiyyətsiz nüsxələr – “Lafufu” adlı saxta məhsullar daxil olub.

Mütəxəssislərin sözlərinə görə, bu oyuncaqlar tez sınır, xırda hissələrə parçalanır və kiçik yaşlı uşaqlarda boğulma riski yaradır. ABŞ İstehlakçı Məhsullarının Təhlükəsizliyi Komissiyası artıq minlərlə belə oyuncaq partiyasını dövriyyədən çıxarıb.

Komissiyanın rəhbərliyi valideynlərə səslənərək bildirib:
“Heç bir ailə uşağının həyatını saxta oyuncağa görə riskə atmaq məcburiyyətində qalmamalıdır.”

Mütəxəssislər bildirirlər ki, orijinal “Labubu” oyuncaqlarını saxtadan seçmək mümkündür: şirkətin istehsal etdiyi məhsullarda hologramlı etiket, yeni seriyalarda isə pəncələrdən birində xüsusi möhür olur.

Hakimiyyət qurumları valideynlərə yalnız etibarlı satıcılardan alış etməyi tövsiyə edir. Çünki sosial şəbəkələrin yaratdığı dəbdən sonra ikinci əl bazarında qiymətlər artsa da, təhlükəli saxtaların sürətlə yayılması uşaqlar üçün real təhlükəyə çevrilib.