Almaniya Kansleri: Azadlıq və təhlükəsizliyi qonşularımızla birlikdə qoruyuruq

Almaniya Kansleri Fridrix Merts Münhen Təhlükəsizlik Konfransının açılışında çıxış edərək, dünyamızın yeni dövrünün güc siyasəti və geosiyasi gərginliklərlə xarakterizə olunduğunu vurğulayıb.

Kansler bildirib ki, Avropa üçün bu şəraitdə əsas prioritet öz dəyərlərini qorumaq, azadlığı müdafiə etmək və gücünü artırmaqdır. O qeyd edib ki, güclü qlobal tərəfdaşlıq şəbəkəsi gələcək beynəlxalq əməkdaşlıq üçün həyati əhəmiyyət daşıyır.

“Bu gün avropalılar kimi bizim əsas vəzifəmiz bu reallığı qəbul etmək və yeni dövr üçün tədbirlər görməkdir”, – Merts söyləyib. O əlavə edib ki, Almaniyanın xarici və təhlükəsizlik siyasəti həmişə Avropa kontekstində formalaşıb və azadlığı yalnız qonşularımızla birlikdə qoruya bilərik.

Kansler həmçinin bildirib ki, əvvəlki kimi hüquq və qaydalara əsaslanan beynəlxalq nizam artıq mövcud deyil, Rusiya-Ukrayna müharibəsi ilə açıq münaqişələrin yeni mərhələsi başlayıb. Trans-Atlantik münasibətlərə də toxunan Merts qeyd edib: “Bəzi məsələlərdə Avropa ilə Vaşinqton fərqli yanaşmalara malikdir. Buna baxmayaraq, tərəfdaşlığın bütün çətinliklərə rəğmən potensialı qalmaqdadır. NATO həm Avropa, həm də ABŞ üçün ortaq rəqabət üstünlüyüdür.”

Kansler Avropanın öz maraqlarını və dəyərlərini qorumaq, gücünə güvənmək və azadlığını təmin etmək zərurətini xüsusi vurğulayıb: “Üstünlük Avropanın azadlığıdır və bu azadlıq yalnız təhlükəsizlik və iqtisadi güc vasitəsilə mümkündür.”