Yaxın Şərq müharibəsində itkilər sürətlə artır

Münaqişələr nəticəsində bölgədə və bəzi qonşu ölkələrdə yüzlərlə insan həyatını itirib. İran Qızıl Aypara Cəmiyyəti ölkədə indiyədək ən azı 1 230 ölüm faktını qeydə alıb. Ölənlər arasında Minab şəhərində ibtidai məktəbə raket zərbəsi zamanı həyatını itirən 175 şagird və məktəb əməkdaşı da var. Qurum məlumatında İslam İnqilabı Keşikçiləri Korpusunun hərbçilərinin bu rəqəmə daxil olub-olmadığı açıqlanmır.

Öz növbəsində İran ordusu bildirib ki, ABŞ-ın sualtı qayığının Şri-Lanka sahilləri yaxınlığında İran hərbi gəmisinə endirdiyi zərbə nəticəsində ən azı 104 nəfər həlak olub; bu itkilər Qızıl Aypara statistikasına daxil edilməyib.

Livanın Səhiyyə Nazirliyi İsrailin zərbələrində 394 nəfərin, o cümlədən 83 uşağın öldüyünü açıqlayıb. İsrail ordusu Cənubi Livanda iki əsgərin öldüyünü, həmçinin ölkədə 11 mülki şəxsin həyatını itirdiyini bildirib. Onlardan 9 nəfəri martın 1-də Qüds yaxınlığındakı Beyt-Şemeş şəhərində İran raket zərbəsi zamanı həlak olub.

ABŞ ordusunun məlumatına görə, İran əleyhinə əməliyyatlarda 7 amerikalı hərbçi ölüb. İraqda isə polis və səhiyyə orqanları ən azı 15 ölüm barədə məlumat verib, o cümlədən “İraqda İslam Müqaviməti” təşkilatının komandiri hava zərbəsi nəticəsində həyatını itirib.

Suriyada fevralın 28-də İran raketinin Süveyda şəhərində binaya düşməsi nəticəsində 4 nəfər ölüb. Körfəz ölkələrində də insan itkisi baş verib: Küveyt 5, BƏƏ 4, Səudiyyə Ərəbistanı 2, Bəhreyn və Oman isə hər biri 1 ölüm barədə məlumat verib.