İran ABŞ və İsrail hədəflərinə zərbələri bərpa edib

İran ABŞ və İsrailin hücumlarına cavab olaraq bölgədəki hədəflərə qarşı əməliyyatları bərpa edib. Rəsmi məlumatlara görə, zərbələr Fars körfəzi və İraq Kürdüstanındakı ABŞ hərbi bazalarına, eləcə də İsrail şəhərlərinə yönəlib.

İslam İnqilabı Keşikçiləri Korpusu 27 Amerika hərbi obyektinin, həmçinin İsrailin Tel Nof hava bazasının, İsrail ordusunun qərargahının və Tel-Əvivdə yerləşən böyük müdafiə sənayesi kompleksinin hədəf alındığını iddia edib.

İran Parlamentinin sədri Məhəmməd Bağır Qalibaf bildirib ki, ölkənin silahlı qüvvələri bölgədəki Amerika və İsrail obyektlərinə qarşı əməliyyatları davam etdirəcək.

ABŞ Prezidenti Donald Tramp isə Tehrana xəbərdarlıq edərək cavab zərbələrindən çəkinməyə çağırıb. O, Truth Social platformasında paylaşım edərək yazıb ki, əgər İran daha sərt hücum həyata keçirərsə, ABŞ da daha güclü cavab verəcək.