Pakistanın Xayber-Paxtunxva əyalətində terror aktı
Bajaur rayonunda avtomobil bombasının partlaması nəticəsində 11 təhlükəsizlik işçisi həlak olub, 7 nəfər yaralanıb; arxasında qadağan olunmuş Təhriki Taliban Pakistan hərəkatının dayandığı bildirilir.
Pakistanın Xayber-Paxtunxva əyalətində baş verən partlayış nəticəsində 11 təhlükəsizlik işçisi həyatını itirib, 7 nəfər isə yaralanıb. Hadisə Bajaur rayonundakı nəzarət məntəqəsində avtomobil bombasının partlaması ilə baş verib.
Bu barədə çərşənbə axşamı yerli hakimiyyət orqanlarına istinadən Pakistan mətbuatı məlumat yayıb. Qəzet, həmçinin Pakistan Silahlı Qüvvələrinin mətbuat xidmətinə istinadla xəbər verib. Yaralananlar arasında qadınlar və uşaqlar da var.
Hakimiyyət terror aktının arxasında ölkədə qadağan olunmuş “Təhriki Taliban Pakistan” hərəkatının tərəfdarlarının dayandığını bildirir. Aparılan əməliyyatlar nəticəsində 12 terrorçunun öldürüldüyü qeyd olunub.
Məlumatda həmçinin bildirilir ki, Xayber-Paxtunxva əyalətində terror hadisələrinin sayı son bir ildə artıb. Pakistan Təhlükəsizlik Araşdırmaları Mərkəzinin hesabatına görə, əyalətdə 2024-cü ildə 1 620, 2025-ci ildə isə 2 331 nəfər terror aktları nəticəsində həyatını itirib.
Şərhlər bağlıdır, lakin trackbacks və pingbacks açıqdır.