Ermənistan Azərbaycandan idxal olunan benzinin keyfiyyətini təsdiqlədi

Ermənistanın Bazar Nəzarəti Müfəttişliyi bildirib ki, Azərbaycandan idxal olunan benzinlə bağlı heç bir keyfiyyət problemi aşkarlanmayıb.

Müfəttişliyin rəhbəri Armen Kotolyan cümə günü keçirdiyi mətbuat konfransında qeyd edib ki, idxal olunan yanacaq partiyaları Ermənistanın Milli Standartlaşdırma və Metrologiya Mərkəzində laboratoriya yoxlamalarından keçirilib. Nəticələr göstərib ki, benzinin keyfiyyəti Avrasiya İqtisadi Birliyinin (AİB) texniki tələblərinə tam uyğundur.

“Keyfiyyət baxımından hər hansı uyğunsuzluq aşkar edilməyib. Lakin yanacaqdoldurma stansiyalarında satılan yanacağın mənşə ölkəsini ayrıca müəyyən etmirik”, — Kotolyan əlavə edib.

Qeyd edək ki, ötən ilin dekabrında Ermənistan onilliklərdən sonra ilk dəfə Azərbaycandan benzin partiyası alıb. Yanacaq Gürcüstan vasitəsilə 1200 ton həcmində daşınıb. Yanvar ayının əvvəllərində isə Azərbaycandan Ermənistana əlavə olaraq 6100 ton benzin və 1500 ton dizel yanacağı göndərilib.